От ыйын 11 күнүгэр Саха Өрөспүүбүлүкэтин Ил Дархана Айсен Николаев Тааттаҕа сырыытыгар байыас дьиэ кэргэнин кытары көрүстэ. Арассыыйаҕа Дьиэ кэргэн, Саха сиригэр Оҕо саас сылыгар буолбут умнуллубат көрсүһүүгэ үрдүкү салалта анал байыаннай дьайыы кыттыылааҕын дьиэ кэргэнэ хайдах олорорун билистэ. Элбэх ыал ийэтэ тустаах көмөнү туһаммытын, олорор усулуобуйаны тупсарыыга ХВС киирэрэ табыгастаах буолуо диэн сүрүн кыһалҕатын биллэрбитэ. Бурнашевтар оҕолоро умнуллубат көрсүһүүгэ билиигэ сирдиир, сайыннарыылаах оонньуулаах «Айар» кинигэ кыһатын бэлэҕин тутан үөрүүлэрэ муҥура суох.
Туйгууна уонна Дайаана Бурнашевалар
Николай уонна Александра Бурнашевтар ыраас таптал иэйиитигэр куустаран, 2021 сыллаахтан дьиэ куортамнаһан бииргэ олорбуттара. Сыл-хонук дииллэринии дьоллоох эдэр дьон Александра Борисовна этэринии: «Аҕабытын кытта биир өйүнэн-санаанан салайтаран, тэҥ долгуҥҥа уйдара сылдьар буолан, күн-дьыл биллибэккэ ааспыта», — диэн бэлиэтиир. Ыал аҕата Николай Аркадьевич Алдан нэһилиэгиттэн төрүттээх. Кини «Төлөн» чох разреһыгар машинист-бульдозериһынан таһаарыылаахтык үлэлиир. Элбэх оҕо ийэтэ Александра Борисовна бухгалтер-экономист идэлээх, билигин «Сулусчаан» оҕо саадыгар үлэлии сылдьар. Кини куоракка үөрэҕин бүтэрэн, «Саха Кредит» потребительскай кэпэрээссийэҕэ специалиһынан ситиһиилээхтик үлэлээбитэ.
Анал байыаннай дьайыы саҕалам-мытын кэнниттэн биир үтүө күн алтынньыга аҕалара бэбиэскэ тутан кэлбитэ. Сарсыҥҥы күнүгэр ыал аҕата Ийэ дойдутун көмүскүү Уссурийскай куоракка көппүтэ. Тустаах миэстэтигэр тиийэн, кини дрону салайар анал кууруһу ааспыта. Хорсун байыас, эрдэ анал байыаннай дьайыыга барыан иннинэ, түөрт сыл хантараагынан сулууспалаабыта. Билигин Хан инники кирбиигэ Ийэ дойдутун көмүскээн, Ытык иэһин толоро сылдьар. Байыас Уссурийскайга учебкаҕа сырыттаҕына, бииргэ сулууспалыыр доҕотторо үсүһүн оҕолонор үөрүүнү буруолаах шашка көмөтүнэн гендер-пати оҥорон биллэрэн соһуппуттара. Төһө да таптаһар сүрэхтэр тус-туспа дойдуга сырытталлар, уолланар дьолун биир күн тэҥҥэ билбиттэрэ.
Эдэр ыал Уһук Илиҥҥи ипотеканы туһанан чааһынай дьиэ атыыласпыттара. «Сулусчаан» оҕо саадын эр дьонун көмөтүнэн көһүү сүпсүлгэнин кыһалҕата суох ааспыттара, кырыа кыһыны туоруур мууһунан хааччыллыбыттара. Нэһилиэк, улуус дьаһалталара, «Төлөн» чох разреһа матырыйаалынай көмөнү оҥорбуттара. Кырачааннар төрөппүттэрэ үлэлиир тэрилтэлэриттэн оҕо-аймах күүтүүлээх бырааһынньыгар Саҥа дьылга, Аҕа дойдуну көмүскээччилэр күннэригэр бэлэх тутан, үөрүүлэрэ үксүүр.
Элбэх оҕолоох ыал аҕата ыам ыйыгар анал байыаннай дьайыыттан уоппускатыгар кэлэ сылдьан, хас биирдии күнүн толору туһанан, саҥа дьиэтигэр сиппэтэҕи ситэрэр, оҥоһуллары оҥорор үөрүүлээх түбүккэ түһэн, дьиэ кэргэнигэр бары усулуобуйаны тэрийбитэ. Олоҕун аргыһа Александра дьиэ кэргэн эрэллээх эркинэ, таптыыр кэргэнэ эппит тылыттан тахсыбатын, үлэһит бастыҥа буолан, бэйэтэ көрө сылдьан барыны дьаһайа, оҥоро сылдьарын сөҕөр.
Эдэр ыал аҕыс саастаах Туйгууна, алталаах Дайаана, биирдээх Дархан диэн оҕолордоохтор. Дьиэ кэргэн кырачааннар төрөөбүт күннэригэр оҕо саас умнуллубат кэрэ түгэннэрин бэлэхтээн, дьолунан толорон бэлиэтиир үтүө үгэстээхтэр.
Билигин Дойду үрдүнэн анал байыаннай дьайыы кыттыылаахтарыгар улахан болҕомто ууруллар. Онон байыаннай дьайыы бэтэрээнин дьиэ кэргэнэ коммунальнай өҥөҕө чэпчэтиилэри туһанара ордук көмөлөөх буолуо эбит.
Мария Павлова.