Алампа кэрэтэ
Алампа ис дууһатынан айбытын,
Биһиги өйдөөн-төйдөөн ааҕабыт!
Алампа тапталынан суруйбутун-айбытын,
Биһиги куруук өйдүүбүт-саныыбыт!
Хас биирдии тылыгар — аан дойду кэрэтэ,
Хас биирдии дорҕоонугар — олох кырдьыга,
Үйэлэри уҥуордаан сүрэхпэр олорор,
Кини талаанын күүһэ олоххо көрүүнү арыйда!
Алампа сырдык суола сулус курдук тыгар,
Муударай санаата хаһан да умнуллубат!
Алампа истиҥ үтүө санаата ийэлии сылытар,
Кыһамньылаах үлэтэ хаһан да сүппэт!
Афанасий Аянитов, 11 физмат кылаас.
~~~~
Алампалыын айанныахпыт
Алаас уола — Алампа
Аатын ааттатар кыһаҕа
“А” буукубаттаан саҕалаан
Ааҕарга, айарга үөрэнэбит.
Аҕа, ийэ алгыһынан
Алампалыын кырдьыксыт
Айылгылаах буола
Айанныахпыт олоххо.
Айаал Чахов, 5в кылаас
~~~~
Таатта талыы ыччата
Саха сирин чулуута,
Таатта талыы ыччата,
Эн буолаҕын эр бэрдэ —
Алаас уола Алампа!
Төрөөбүт-үөскээбит дойдугун,
Талыы талба Тааттаҕын,
Ытык мааны Сахан сирин
Үйэлэргэ ааттаттыҥ.
Эн туойбут үрүҥ туллугуҥ,
Туллук-туллук доҕотторуҥ,
Уостан түспэт хоһоонноруҥ,
Кэхтэн биэрбэт кэпсээннэриҥ
Сымнаталлар сүрэҕи,
Уоскуталлар дууһаны,
Инникигэ кэрэни ыралыыллар,
Тулхадыйбат модун күүһү эбэллэр!
6 «А» кылаастан Лилия, Нария Владимировна,
Наталья Дмитриевна Охотиналар.
~~~~
Алампа
Оккуодай алааска
Тымныы кыһын
Төрөөбүтэ уолчаан.
Олох араас очурдарын,
Сырдык олох иһин
Туруулаһан ааспыта.
Үөрэх-билии суолун,
Айар-тутар аартыгын
Саталлаахтык туппута.
Бу буолар улуу киһи,
Сырдык, баай дууһалаах
Алаас уола — Алампа.
Ева Ефимова 8 гумнаитарнай кылаас.
~~~~
Туллуккун эн өрө уунаҥҥын
Оскуолам таһыгар тураҕын,
Туллуккун эн өрө уунаҥҥын
Үрдүккэ, кэрэҕэ ыҥыра
Үөрэх киэҥ аартыгар угуйа.
Билэбит эн уустук олоххун
Ол кэмҥэ ыардары тулуйа,
Норуотуҥ сайдарын туһугар ,
Элбэххэ билиини биэрбиккин.
Тапталы, ып- ыраас иэйиини,
Эн өрө туппутуҥ олоххор
Сып- сырдык туллукка холооҥҥун
Үрдүккэ көтүтэ тутаҕын.
Эн ааккын кэриэстээн, киэн тутта
Оскуолам ааттатта туруоҕа
Үйэттэн, үйэҕэ бэриллэ
Сахаҕа самныбат сурахтаан.
6 «А» кылаастан Олеся, Мария Михайловна Татариновалар.
Оскуолам миэнэ Алампалыын
Дойдум миэнэ — Алампалыын,
Оскуолам миэнэ – Алампалыын,
Саҥам-иҥэм, өйүм-санаам
Барыта — биир ситимнээх.
Улуу убайбыт Алампа,
Эн аатын куруук
Ааттана турдун!
Кэнэҕэски ыччакка
Билиини, үөрэҕи
Өрө тутарга
Көмөлөһө туруохтун!
Алампа —
Мин киэн туттуум, сүгүрүйүүм!
Андреев Артем 8 медицинскэй кылаас.
~~~~
Эйиэхэ сүгүрүйэбит!
Алампа, эн, саха биир чулуу уолаҕын,
Норуотун дьиҥ олоҕун сахалыы
Ыраҥалаан, ойуулаан көрдөрбүтүҥ,
Араас тылынан тылбаастанан
Саха омугу аай дойдуга таһаардыҥ.
Норуотуҥ туһугар олоххун толук ууран,
Кини сайдарыгар араас суолу
Тобулан инникигэ аспытыҥ,
Эн эппит кэриэс тылларыҥ
Уот харахха быраҕыллаллар,
Эн суруйбут үтүө тылларыҥ
Суоруллубат номоххо тиһиллэллэр.
Эн хоһоонноруҥ, кэпсээннэриҥ
Өрүүтүн ааҕылла-үөрэтиллэ туруохтара!
Биһиги эйиигинэн киэн туттабыт!
Эйиэхэ сүгүрүйэбит!
Бояров Юлиян 8 ИТ кылаас үөрэнээччитэ.
~~~~
Алампа
Махтал тахсар ис сүрэхпиттэн
Эн сайдыы сиргэ аҕалбыккар,
Махтал тылбын харыстаабаппын,
Эйиэхэ анаан хоһооммун аныыбын…
Махталы таптыыбын,
Махталы туойабын,
Махталы таайабын,
Махталы уунабын эйиэхэ.
Эн сырдык уобараскын көрөн,
Эдэр ыччат маарынныаҕын баҕарар!
Эн хоһоонноргун ааҕан,
Киһи үөрүөҕүн баҕарар!
Филатова Надя, 10 гуманитарнай кылаас.
~~~~
Биир быстыбат ситимнээх
Төрөөбүт төрүт дойдубут,
Үөрэнэр, тапталлаах оскуолабыт —
Алаас уола Алампалыын,
Биир быстыбат ситимнээх.
Кини кыһатыгар үөрэнэр,
Туллуктар — доҕоттор
Убайбытын бука бары,
Киэн тутта саныыллар.
Кини айбыт айымньылара,
Кини хаалларбыт тыллара
Эппит-сииммит устунан,
Иҥэн хаалан сылдьыаҕа.
Улуу Убайбыт Алампа,
Үөрүүлээх, хомолтолоох кэмнэргэ,
Куруук биһигини кытары
Санаабытыгар буолуоҕа.
Инники ыраас суолу
Ыйан-кэрдэн хаалларбыт
Ытык киһибитин Алампаны
Убаастыыбыт, ытыктыыбыт!
Ефимова Диляра, 10 медицинскэй кылаас.
Бэлэмнээтэ Галина ИМ.