Н.Е.Мординов — Амма Аччыгыйа аатынан Харбалаахтааҕы үөрэхтээһин холбоһуга үтүө үгэһин тутуһан, сылын аайы «Учуутал күнүн» 11 кылаас үөрэнээччилэрэ иилээн-саҕалаан ыыталлар, учууталлары солбуйан, уруок ыыталлар, оонньуу тэрийэллэр.
Быйылгы үөрэх дьылыгар 7 выпускник 5-10 кылаастары үллэстэн, кылаас салайааччытын оруолун толордулар, нэдиэлэни быһа араас үлэни ыыттылар: хаһыат таһаартарыыта, музыкальнай нүөмэрдэри бэлэмнээһин о.д.а.
Бырааһынньык күн сарсыардаттан оҕолор бука бары учууталлары эҕэрдэ аккырыыккалаах, минньигэс тутуурдаах үөрэ-көтө көрүстүлэр. Бу күн кылаастар учууталларга анаан бэлэмнээбит эҕэрдэ нүөмэрдэрин көрдөрдүлэр, учууталларга араас көрдөөх оонньуулары оонньоттулар.
«Бэйэни салайыныы күнүн» директор-Ян Васильев, үөрэх чааһыгар директоры солбуйааччы- Алиана Данилова, иитэр үлэҕэ директоры солбуйааччы- Викториан Герасимов уонна учууталлар: Мотя Собакина, Алевтина Андреева, Вадим Осипов, Женя Сердцев олус үчүгэйдик тэрийэн ыыттылар.
Уоскулаҥ кэмигэр линейка ыыттылар, оҕолору оонньоттулар. «Солбук учууталлар» уруоктарын оҕолор олус сөбүлээбиттэр, үчүгэйдик өйдөтөллөр диэн сэҥээрбиттэрин биллэрдилэр.
Кылааһым оҕолоро бэйэлэрэ иилээн-саҕалаан, нэдиэлэ устата түбүгүрэн, учуутал оруолун олус бэркэ толорбуттарыттан, учууталларга бэртээхэй дьоро уонна сынньалаҥ күнүн бэлэхтээбиттэриттэн олус үөрдүм уонна астынным.
Маны таһынан, оскуола үөрэнээччилэрин «Орто-Амма кэскилэ» түмсүүтэ иитэр үлэни тэрийээччи Варианна Васильевна Макарова салалтатынан «Бэйэни салайыныы күнүн» туһунан видеоролик таҥан оҥордулар, үөрэнээччилэр санааларын уһуллулар.
Варвара Трофимова, Харбалаах.