Таатта улууһун Дьүлэй нэһилиэгэр олунньу 4 күнүгэр саха саҥалаах киэн туттар, чаҕылхай талааныгар сүгүрүйэр таптыыр артыыспытын Фрументий Петровиһы, кини олоҕун аргыһын Нина Ильиничнаны уонна кып-кыра эрдэхтэн ырыаны олоҕун аргыһа оҥостубут, «Кулунчук, уу-чукучук» ырыатын хас биирдии саха киһитин өйүгэр иҥэрбит Ваня Трофимов – Дуолан уонна олоҕун аргыһа, ырыа айааччы Кэрэ-Куо Анита икки көлүөнэ дьиэ кэргэн кэнсиэртэрин астына, олус да үөрэ, дуоһуйа көрдүбүт.
Саха сирин эрэ буолбакка, бүттүүн модун Россия Ийэ Хотун культуратын, искусствотын сайдыытыгар туохха да тэҥнэммэт улахан кылааты күн бүгүҥҥээҥҥэ диэри киллэрэ сылдьалларыттан сөҕү диэн сөхтүбүт, махтанныбыт.
Сыллары уҥуордаан талааннара өссө баай, чаҕылхай буолан иһэрин сөҕө астынныбыт. Дьиэ кэргэттэр кэрэ мөссүөннэрэ, бииртэн биир чаҕылхай ырыалара сүргэбитин көтөхтө.
Өрүүтүн маннык айа-тута, кэрэни, үтүөнү үксэтэ сылдьалларыгар баҕаран туран, нэһилиэк баһылыга Осипов Олег Дмитриевич дьонун-сэргэтин аатыттан олохтоох маастар Ермолаев Яков Прокопьевич хатыҥ мастан чочуйан оҥорбут үс атахтаах Дьол чороонун аҕа саастаах дьиэ кэргэн аҕа баһылыгар Фрументий Петровичка дохсун ытыс тыаһыгар доҕуһуоллатан, кыракый Дьүлэй нэһилиэгин туһунан үтүө өйдөбүлгэ бэлэх уунна.
Икки көлүөнэни ситимниир, киһи эрэ долгуйа-астына көрөр, дууһалыын сынньанар дьоро киэһэни Дьүлэй туонатыгар бэлэхтээбиккитигэр махтал тылбытын тиэрдэбит.
Любовь Ефимова.