Вера Александровна Канаева Россия суруналыыстарын Сойууһугар 2019 сыллаахха киирбитэ. Эһиилигэр сахалыы суруйар суруналыыстар “Уһун Дьурантаайы” куонкурустарыгар “Бастыҥ кэпсэтээччи” анал ааты ылбыта. Онтон салгыы Саха АССР 100 сылыгар 2022 с. “Мир и согласие” (республиканский конкурс по вопросам межнациональных и этноконфессиональных отношений) куонкуруска 1 миэстэни ылбыта.
Саҥа үүммүт сыл Вера Александровнаҕа ситиһиилээхтик саҕаланна. Ол курдук быйылгы Бэчээт күнүн көрсө өрөспүүбүлүкэ суруналыыстарын ортотугар ыытыллар күөн күрэскэ “Общественнай корреспондент” диэн түһүмэххэ бириэмийэҕэ тигистэ. Бу ыйааһыннаах бириэмийэ өрөспүүбүлүкэ хаһыаттарыгар, сурунаалларыгар ситимнээхтик, интэриэһинэй олохтоох, дьикти дьарыктаах саха дьонун суруйан киэҥ эйгэҕэ таһаарар бастыҥтан бастыҥ корреспонденнарга иҥэриллэр.
Вера эдьиийин, саха суруналыыстыкатыгар биллэр суолу-ииһи хаалларбыт, норуот тапталлаах суруналыыһын Анастасия Александровна Морхоева дьыалатын салҕаан, батыһан, саҥа кэмҥэ сыһыаран байытан, суруйар-бичийэр дьарыкка ылларан, тиһигин быспакка Таатта үлэһит дьонун, олоҕун-дьаһаҕын, ситиһиилэрин, интэриэһинэй дьылҕалаах дьону булан “Киин куорат”, “Ил Түмэн”, “Дьулурҕан”, «Таатта» хаһыаттарга, “Байдам” сурунаалга суруйан сырдатар. Кинини үрдүк наҕараадатынан эҕэрдэлиибит! Баҕарабыт өссө да Тааттатын туһунан чаҕылхай суруйуулары таһаара турарыгар, айар үлэтигэр ситиһиилэри!
Аграфена Неустроева.