Хас биирдии киһи сүрэҕэ сөбүлүүр, дууһата манньыйар дьарыгын таба тайаннаҕына санаалыын сырдыыр, сүргэлиин көтөҕүллэр. Маннык дьарык киһини угуйар, умсугутар сүдү күүстээх.
Биһиги кэллиэгэбит «Таатта» хаһыат редакциятын менеджерэ Марина Степановна Ордахова сыллата өлгөм үүнүүлээх, бастыҥ быйаҥнаах оҕуруотунан барыбытын сөхтөрөр. Кини күлүмнэс күннээх сандал саас кэлиитэ, хас биирдии үүнээйитин сиэмэтин буорга баттыырыттан саҕалаан, оҕолуу бүөбэйдээн көрөр-истэр үтүө үгэстээх.
Айылҕаттан бэриллибит кистэлэҥ талааннаах ыал ийэтин, эйэҕэс эбэтин тэлгэһэтэ сайын ахсын хараҕы үөрдэр сиэдэрэй сибэккилэринэн симэнэр.
Сатабыллаах оҕуруотчут күрүөтүн иһигэр сибиркэ яблоня курдук сэдэх маһы тэҥэ, рябина, уохта, малина, моонньоҕон курдук отонноох үүнээйи арааһын олордор.
Ыал тумус туттар киһитэ дьиэ кэргэнин номнуо ыаҕайаны толору хомуллубут минньигэс амтаннаах клубникатынан күндүлээбитэ, дыргыл сыттаах дьэдьэнинэн маанылаабыта.
Ол курдук бастыҥ оҕуруотчут астына-дуоһуйа үүннэрбит иҥэмтэлээх битэмииннээх оҕуруота өлгөм астанан, силигилии турара сүрэҕи үөрдэр.
Тэлгэһэ иһин тупсаҕайдык оҥорон кэрэ эйгэни тэрийии бэйэбититтэн тутулуктаах.
Мария Павлова.