Икки фронт сэриилэрин көрсүһүүлэрэ

Аҕа дойдуну көмүскүүр Улуу сэрии сылларыгар буолбут Ленинград героическай оборонатын туһунан биһиги мэлдьи киэн туттан туран ахтабыт.

-Нева өрүс үрдүгэр турар улуу куораты көмүскээн, норуот албан ааттаах легендарнай хорсун быһыыны оҥорбута. Куорат, 900 хонук устатыгар өстөөх төгүрүктээһинин ортотугар олорон, хорсуннук охсуспута, осадалааһыны эр санаалаахтык  тулуйбута уонна өстөөҕү кыайбыта.

-Немецкай-фашисткай командование суостаах-суодаллаах быһаарыыны ылыммыта – Ленин куоратын бомбалааһынынан уонна артиллерийскай уотунан сири кытта тэҥнииргэ, нэһилиэнньэтин аччыктатан кыайарга. Ол эрээри Ленинград албаннаах көмүскээччилэрин бойобуой тыыннарын туох да булгуруппатаҕа. Куорат оборонатын коммунистар баһылаабыттара. Кинилэр фашистары абааһы көрөргө уонна кырыктаах кыргыһыыга ыҥыран, куорат нэһилиэнньэтин, советскай буойуннары биир өйгө-санааҕа түммүттэрэ. Ленинградскай фронт сэриилэригэр партизаннар эмиэ дьоһуннаах көмөнү оҥорбуттара. Ленинград көмүскээччилэригэр дойду уонна бары союзнай республикалар күннэтэ көмөлөһөллөрө. «Олох суола» диэн ааттаммыт Ладожскай күөлүнэн сылдьыһар, аһы-үөлү таһар, сэрии сэбин тиэрдэр суос-соҕотох биир суол баара.

-Ленинград блокадатын тоҕу көтөргө уонна өстөөххө суоһарыылаах охсууну оҥорорго дойду бүтүннүүтэ бэлэмнэммитэ. Тосту уларыйыы түгэнинэн Ленинградскай уонна Волховскай фроннар сэриилэрэ кимэн кириилэрин операцията буолбута. Операция блокаданы тоҕо көтөр сыаллааҕа уонна 1943 сыл тохсунньу 12 күнүттэн саҕаланан баран, тохсунньу 18 күнүгэр икки фронт сэриилэрэ утарыта холбоһууларын ситиһиилээхтик түмүктэммитэ.

-Куорат дойду киинин кытта хонуунан сибээстэһэр кыахтаммыта. Сити бириэмэттэн ыла инициатива Советскай Армия илиитигэр киирбитэ. Аны өстөөх блокадатын букатыннаахтык эһэргэ бэлэмнэнии саҕаламмыта. Өр күүтүллүбүт өрөгөйдөөх күн 1944 сыллаахха тохсунньу 27 күнүгэр үүммүтэ. Ити күн Ленин улуу куората өстөөхтөн букатыннаахтык босхоломмута.

 

П. Арылахов, Аҕа додуну көмүскүүр Улуу сэрии кыттыылаҕа,

үс «Хорсунун иһин» медаль кавалера.

Читайте дальше