Балаҕан ыйын 21 күнүгэр үгэс быһыытынан, Ситэриилээх Киин кэмитиэт уонна Совнарком бэрэссэдээтэлинэн, Дьокуускайдааҕы Киин электрическэй станция дириэктэринэн, Саха АССР хомунаалынай хаһаайыстыба наркомунан үлэлээбит биир дойдулаахпытыгар, Ананий Кононович Андреевка сүгүрүйүү күнэ ыытылынна.
«СӨ ОДьКХ» ГУТ салалтата, өрөспүүбүлүкэ филиалларын бары дириэктэрдэрэ кыттыыны ыллылар.
Күн бастакы аҥарыгар производственнай объектарынан, Боробулга, Чычымахха тутулла турар котельнайдарынан, музейга сырыттылар.
А.К. Андреев аатынан ОДьКХ музейыгар сэргэх кэпсэтии буолан ааста. Музей сэбиэдиссэйэ Г.Е. Арылахова музей сүнньүнэн ыытыллар үлэлэри, саҥа тахсыбыт кинигэни, инники соруктары билиһиннэрдэ. Салгыы СӨ Национальнай архивын кылаабынай архивиһа Вячеслав Сергеевич Сивцев А.К. Андреевка сыһыаннаах оччотооҕу кэм докумуоннарын аҕалан көрдөрөн, кэпсээн улахан болҕомтону тарта, интириэһи үөскэттэ. Ананий Кононович бэйэтэ толорбут личнэй дьыалатын, Дьокуускай куорат, электрическэй станция тутуллуутугар сыһыаннаах, Андреев илии баттааһыннаах докумуоннары көрдүбүт.
Балаҕан ыйын 21-22 күннэригэр Ил Түмэн Судаарыстыбаннай мунньаҕын 3 этээһин саалатыгар республика бөдөҥ салайааччыта А.К. Андреевка аналлаах быыстапка аан бастакытын туруорулунна. Бу күннэргэ «Биир ньыгыл Россия» фракциятын мунньаҕын кыттыылаахтара, саҥа талыллыбыт Норуот дьокутааттара, Ил Түмэн аппаратын үлэһиттэрэ быыстапканы сэҥээрэ көрдүлэр.
Күнүс 2 чаастан Куонаан арыытыгар А.К. Андреев скверигэр муһуннубут. Ытык киһибитигэр сүгүрүйэн сибэкки дьөрбөтүн, гирлянда уурдубут. Улууспут саҥа баһылыга Айаал Семенович Бурцев кыттыыны ылла, эҕэрдэтин эттэ. Дойдутун туһугар үлэтэ бу улахан тэрээһинтэн саҕаламмыта үтүөнү эрэ түстээтин! Эҕэрдэ тыллары «СӨ ОДьКХ» ГУТ генеральнай дириэктэрэ В.С. Чикачев, СӨ олоҕу хааччыйар тэрилтэлэр идэлээх Союзтарын бэрэссэдээтэлэ С.Е. Анисимов, Улуус мунньаҕын дьокутаата П.Е. Захаров, «Дьохсоҕон нэһилиэгэ» МТ баһылыгын э.т. Е.Е. Саввин эттилэр.
Тэрээһин саамай долгутуулаах чааһа тиийэн кэлэр. 12-с төгүлүн туттарыллар А.К. Андреев аатынан 50 тыһ. сууммалаах стипендияны генеральнай дириэктэр В.С. Чикачев быйыл үчүгэй үөрэхтээх, АГАТУ III-с кууруһун бастыҥ устудьуонугар Артем Рожиҥҥа туттарда. Үлэ сылынан иккис үчүгэй үөрэнээччи Евгений Заворотнайга СӨ Олоҕу хааччыйар тэрилтэлэр идэлээх Союзтарын бэрэссэдээтэлэ С.Е. Анисимов үөрүүлээх быһыыга — майгыга эҕэрдэ суругу уонна сертификат туттарда.
Өр сыл үтүө суобастаах үлэлэрин иһин Уолбаттан Н.И.Никонов, П.С.Иванов «СӨ ОДьКХ» ГУТ бэтэрээннэрин аатын сүктүлэр, үчүгэй үлэлэрин иһин ОДьКХ Тааттатааҕы филиалын сүрүн специалиһа А.Г.Мурунов, кочегардар В.И.Тарабукин («Олимпийскай»), И.Н.Яковлев («Сельхозхимия») о.д.а. генеральнай директор аатыттан Почетнай грамоталары туттулар.
Бу улахан тэрээһиммит саҥа оҥоһуллубут «Дириэктэрдэр аллеяларыгар», ааттара суруллубут табличкалардаах 45 мас олордуутунан түмүктэннэ. Быйыл Тааттатааҕы, филиал саҥа дириэктэрин В.П.Будикин салалтатынан бу тэрээһиммит үрдүк далааһыннаахтык буолан ааста.
Галина Арылахова.