Кулун тутар 11 күнүгэр Аҕа дойду сэриитигэр Улуу Кыайыы 80 сылыгар аналлаах СӨ үөрэҕириитин үтүөлээх үлэһитэ уонна РФ уопсай үөрэхтээһинин бочуоттаах үлэһитэ Петрова Маргарита Константиновна аатынан «Кылаас салайааччыта-2025» диэн үһүс өрөспүүбүлүкэтээҕи идэҕэ дьоҕурдарын-сатабылларын күрэһэ буолан ааста.
Бу күрэс республика 20 араас оскуолаларыттан уонна оройуоннарыттан учууталлары мунньубута улахан суолталааҕын, далааһыннааҕын бэлиэтиир.
Бастакы күн кыттааччылар регистрацияны аастылар уонна тэрээһин сыалын-соругун билиһиннэрэр семинарга кытыннылар. Кэлбит дьон бары сэрэбиэй бырахсан тыл этиитин бэрээдэгин быһаарыстылар, онтон өрөспүүбүлүкэ кылаас салайааччыларын Сэбиэтэ тэрийбит умсугутуулаах педагогическай квиз туоһутунан буоллулар. Бу тэрээһин педагогтарга уопут атастаһалларыгар уонна билиилэрин-көрүүлэрин көрдөрөллөрүгэр ураты кыаҕы биэрдэ.
«Кылаас салайааччыта — 2025» күрэс бырааһынньыктааҕы аһыллыыта өйгө хаалар, өрө күүрүүлээх чаҕылхай түгэн буолла. С.Н. Донской — II аатынан үөрэх сайдыытын уонна учууталлар квалификацияларын үрдэтэр институт директорын 1 солбуйааччыта, п.н.д. Алексеева Галина Ивановна учууталлар идэлэрин үрдэтиигэ уонна үөрэх процеһын тупсарыыга маннык дьаһаллар суолталарын тоһоҕолоон бэлиэтээтэ. Ону сэргэ Маргарита Константиновна Петрова бииргэ төрөөбүт балта Октябрина Константиновна Спиридонова кыттааччыларга, тэрийээччилэргэ махталын уонна өйөбүлүн биллэрдэ.
Тэрээһин бастакы түһүмэҕэр кыттааччылар «Классно быть «классным» диэн айар презентацияларыгар бэйэлэрин ураты методическай булумньуларын, айар бырайыактарын уонна идеяларын билиһиннэрдилэр, профессионализм уонна креативность үрдүк таһымын көрдөрдүлэр.
Кыттааччылар хас биирдиилэрэ үөрэх эйгэтин үөскэтиигэ уонна үөрэх хаамыытыгар үөрэнээччилэр интэриэстэрин өйөөһүҥҥэ кылаас салайааччытын оруолун көрдөрөргө дьулустулар. «Кылаас салайааччыта — 2025» күрэс экспертэрэ кыттааччылар визиткаларыгар талааннарын уонна креативностарын үрдүктүк сыаналаатылар.
«Кылаас салайааччыта — 2025» күрэс бастакы күнэ бу тэрээһин бастыҥ педагогтары быһаарар эрэ буолбакка, хардарыта уопут атастаһыытын, үөрэх эйгэтигэр саҥа идеялары, үлэҕэ саҥа сыһыаннары үөскэтиигэ эмиэ көмөлөөх буоларын ыйда. Кылаас салайааччыларын конкурстарын таһынан, С.Н.Донской аатынан үөрэх сайдыытын уонна квалификацияны үрдэтии института «Кылаас салайааччытын үлэтин-хамнаһын тиһигэ: методическай доҕуһуол» диэн темаҕа квалификацияны үрдэтии курстарын ыытар. Курс ис хоһооно истээччилэр профессиональнай компетенцияларын салгыы сайыннарыыга туһуламмыта, биллэн турар, республика үөрэҕин процеһыгар үчүгэйдик сабыдыаллыа.
Кыттааччыларбыт иннилэригэр 3 күннээх айымньылаах ис хоһоонноох үлэ, кылаас салайааччыта буолар үөрүйэҕи атастаһыы күүтэр. Биһиги бу күрэс үөрэх хаачыстыбатын тупсарыыга уонна педагогтары саҥа ситиһиилэргэ көҕүлүүр дьоһун хардыы буолуо диэн эрэнэбит.
Д. Миронова