Тохсунньу 27 күнүгэр Авксентий Егорович Мординов аатынан Тааттатааҕы лиссиэйгэ Ленинград куорат босхоломмут күнүгэр анаммыт хас биирдии кылааска дьоһуннааҕы кэпсэтии буолла.
Ону таһынан 10-c кылаас үөрэнээччилэрэ “Блокадная ласточка” диэн өрөспүүбүлүкэтээҕи акцияҕа кытыннылар, значок оҥордулар.
Саҥа библиотекабытыгар “Непокоримый город – блокадный Ленинград” диэн ааттаах быыстапка турда. Оҕолор олус сэргээн көрдүлэр.
Биһиги оскуолабытыгар «Мин хос-хос эһэм, эбэм чымадааннара cэрии туһунан тугу кэпсиирий?» диэн бырайыак үлэлиир. Ол курдук 11-с «б» кылаас үөрэнээччитэ Федоров Байдам хос эбэтин Вера Васильевна чымадаанын аҕалбыт. Бу чымадаан лиссиэй оҕолоругар наһаа элбэх историяны кэпсээтэ. Ленинград блокадатыгар 16 саастааҕар түбэспит, аас-туор олоҕу этинэн- хаанынан билбит, норуот үөрэҕириитин туйгуна Вера Васильевна Данилова туһунан матырыйааллары мунньан, оҕолоро, сиэннэрэ «Чымадаан иһинээҕи музей» оҥорбуттарын оҕолор олус интэриэһиргээн көрдүлэр.
Манна кини олоҕун, үлэтин туһунан кэпсиир хаартыскалар, тутта сылдьыбыт маллара бааллар. Сиэннэригэр анаан суруйбут, уруоктарыгар бэлэмнэммит, төрөппүттэргэ анаабыт тэтэрээттэрэ болҕомтону тардаллар.
Сиэннэригэр анаабыт суруктарыттан оҕолор Ленинград блокадатын ыар күннэрин туһунан биллилэр, сөхтүлэр. Мунньуллубут матырыйааллар дойдубут историятын биир умнуллубат кэмин өйдүүргэ, сүгүрүйэргэ тирэх буолаллар.
Куннэй Алексеевна, Александра Алексеевна.