Истиҥ таптал иэйиитинэн,
Дьоллоох олох суолунан.
Үүнэр сыл үтүө илдьитинэн, ЗАГС уорганнарын күнүн көрсүү кэрэ кэһиитинэн, бүгүн, талыы талба Таатта килбэйэр киинигэр, Ытык ыалбыт Маргарита Николаевна уонна Роберт Николаевич Николаев сүрэхтэрин холбоон олорбуттара 55 сыла үбүлүөйдээх уруулара — үйэлээх олоҕу бэлиэтиир, изумруд таастыы күлүмүрдүү оонньоото.
Дьылҕа Хаан ыйааҕынан эдэр саас эрчимнээх кэмнэригэр Омскай куорат икки сүрэх истиҥ иэйиитин холбообута. Эдэр устудьуоннар Омскайдааҕы государственнай институкка ситиһиилээхтик үөрэнэн, үлэни өрө тутар дьонунан буолбуттара. Ол кэмтэн саҕалаан, икки сүрэҕи истиҥ таптал, талан ылбыт идэ, олоҕу мындырдык көрүү, биир санааланыы быстыспат ситимнээбитэ.
Ытык дьоммут Орто туруу бараан дойдуга саха буолан сандааран, киһи буолан килбэйэн, сирдээҕи ытык иэстэрин чиэстээхтик толорон, 3 оҕо күн күбэй ийэтинэн, амарах аҕатынан, 4 сиэн, 2 хос сиэн эйэҕэс эбэтинэн, эһэтинэн буолаллар.
Үөрүүлээх быһыыга-майгыга СӨ бырабыыталыстыбатын иһинэн Судаарыстыбаннай турук аахталарын суруйар управление саалайааччыта Нария Пестрякова таптал, бэриниилээх буолуу туоһутунан «Килбиэннээх дьиэ кэргэн» анал бэлиэни ылан, Таатта улууһун «Бочуотун кинигэтигэр» киирдилэр.
Тэрээһин үөрүүтүн үрдэтэн, СӨ Ил Дархана Айсен Николаев аатыттан истиҥ тыллаах эҕэрдэ сурук туттарылынна.
«Таатта улууһа» МО Аҕа баһылыгын солбуйааччыта Святослав Сунхалыров улуус дьаһалтатын уонна «Дьүлэй нэһилиэгэ» МТ баһылыга Олег Осипов ааттарыттан салайар үлэ төһүү үлэһитэ Маргарита Николаевна илэ бэйэтинэн куруук кыраһыабай буолуу үрдүк көрдөрүүтүн туоһутунан буоларын этэн туран, Таатта улууһун сайдыытыгар дьоһун кылааты киллэрбит Роберт Николаевич олоххо тапталларынан, үлэҕэ сыһыаннарынан үтүө холобур буолалларын бэлиэтээтэ.
«Тааттыныскай нэһилиэк» МТ баһылыга Егор Павлов салайар үлэ төһүү үлэһитэ Маргарита Николаевна, Таатта улууһугар тыа хаһаайыстыбатын сайдыытыгар сыаналаммат кылааты киллэрсибит Роберт Николаевичтыын улуус Ытык ыалларыгар истиҥ эҕэрдэтин тиэртэ.
Таатта улууһун бэтэрээннэрин Сэбиэтин бэрэссэдээтэлэ Маргарита Попова тыа хаһаайыстыбата, улуус сайдыытыгар таһаарыылаахтык үлэлээбит, холобур буолар дьоһун ыалынан буолалларын, ааспыт кэмҥэ үлэ дьоно үлэлээн-хамсаан ааспыттарын сырдатта. Таатта улууһун историятын кэрэһэлиир кинигэни бэлэх уунна.
Улуустааҕы дьиэ кэргэн уонна ыччат политикатын салайааччыта Иван Иванов эдэр көлүөнэҕэ үтүө холобур буолар Николаевтар дьоллоох дьиэ кэргэн 55 сыл бииргэ олорбуттарынан истиҥник эҕэрдэлээтэ.
Улуустааҕы тыа хаһаайыстыбатын управлениетын уонна профсоюһун аатыттан Гаврил Кычкин холобур буолар дьиэ кэргэни эҕэрдэлээн туран, үлэни өрө тутар Роберт Николаевичтыын улуус тыатын хаһаайыстыбатын сайдыытыгар төһүү күүс буолан үлэлээн ааспыт дьоллоох кэмнэрин, үтүө тылынан аҕынна.
Николаевтар дьиэ кэргэн оҕолорун ааттарыттан кыыстара Екатерина Робертовна, сиэннэрэ тумус туттар тапталлаах дьоннорун үөрүүлээх күннэринэн истиҥ эҕэрдэлэрин тиэрдэн туран, аныгы үйэ сиэринэн Роберт Николаевич Таатта сириттэн Казахстаҥҥа, Германияҕа, Омскайга олорор доҕотторун-атастарын кытары ыкса сибээһи олохтоон, күннэтэ Skype-киэбинэн билсэ олорорун ыҥырыылаах ыалдьыттарга сырдатта. Онон Аҕа киһи дьиэ кэргэҥҥэ «Президент Владимир Путин курдук международнай таһымнаах киһи» буоларын бэлиэтээтэ.
Таатта улууһа холобур туттар «Килбиэннээх дьиэ кэргэнигэр» баҕа санаа бастыҥа, үтүө санаа үтүмэнэ ананнын! ЭРЭЛ, ИТЭҔЭЛ, ТАПТАЛ эрэ арыаллаатын!
Ил туруктаах дьиэ кэргэни
Чолбон сулуска холуубун,
Эйэлээх ыал холумтанын
Эйэ холуубар тэҥниибин.
© М.В.
Мария Павлова.
Видеоматырыйаалы бэлэмнээтэ Михаил Копырин.