Таатта улууһун 160 киһилээх хамаандата Амма улууһугар өрөспүүбүлүкэтээҕи 17-ис Олоҥхо Ыһыаҕар ситиһиилээхтик кыттан кэллэ. Улуус баһылыга А.С.Бурцев уонна баһылык солбуйааччыта С.В.Сунхалыров салалталаах талааннаах дьоммут — олоҥхоһуттар, тойуксуттар, оһуохай этээччилэр, чабырҕахсыттар, хомусчуттар, мас тимир уустара, уран тарбахтаах иистэнньэҥнэр, норуот маастардара кыайыы кынаттанан, улуус чиэһин көмүскүүр ытык соруктарын толорон, кэрэҕэ-үтүөҕэ эҥэрдэһэн, күүстэригэр күүс эбиллэн, санаалара сырдаан, дууһалара дуоһуйан, үөрэн-көтөн, ыалдьытымсах Аммаларга ис сүрэхтэриттэн махталлаах эргилиннилэр.

Кыыс Амма дьоно-сэргэтэ чуолаан, бу ыһыахха Таатта улууһун делегациятын икки күнү тургу Эмис нэһилиэгэ (баһылык Тааттаттан төрүттээх Бубякин Прокопий Петрович) итии аһынан, сөрүүн утаҕынан хааччыйан, илии тутуурдаах, өттүк харалаах сахалыы сиэри-туому тутуһан үрдүк таһымнаахтык көрсөн, атааран, ыалдьыттары манньытта, үөртэ. Манна таарыччы аҕыннахха норуот тапталлаах суруйааччылара Эмис нэһилиэгиттэн төрүттээх поэт Күннүк Уурастыырап уонна Таатта туйгун уола, прозаик Амма Аччыгыйа үйэлэргэ өлбөөдүйбэт доҕордуулар буолалларын билбэт саха суоҕа буолуо. Онон ити доҕордуу сыһыан өссө тэнийиэ, чиҥиэ диэн эрэниэҕиҥ.
Саха Өрөспүүбүлүкэтин Ил Дархана А.С.Николаев уонна бочуоттаах ыалдьыттар уустар түһүлгэлэригэр, иһит быыстапкатыгар сылдьан, олус сэҥээрдилэр, биһирээтилэр. Биһиги улуус баһылыга А.С.Бурцев Олоҥхо Ыһыаҕын «Үс дойду мааны иһитэ» күрэхтэһиитигэр анал бирииһи туруорбута. Ону Чурапчыттан сылдьар Гаврил Егоров, Мандар Уус анал бирииһин Андрей Малышев (Хатас) туттулар.

Олоҥхо Ыһыаҕар Таатталарга атах оонньуутугар спорт маастара, куобах көрүҥэр элбэх төгүл рекорд туруорбут биир дойдулаахпыт Андрей Васильев үс көрүҥ түмүгүнэн 84,96 см. ыстанан, бастакы кыайыыны аҕалбыта. Киниэхэ Амма чулуу уола циркач Сергей Расторгуев аҕата Василий Расторгуев төрөөбүтэ 105 сылынан туруорбут бирииһэ 105 000 солк. ананна. 2 миэстэ Ньургун Сокольников — Уус Алдан (84,96 см) 50 000 солк. 3 миэстэ Кай Адамов — Горнай улууһа (83,60 см) 30 000 солк.

Аны ыһыах саамай күүтүүлээх спорт тэрээһинигэр «Эр бэрдэ» многоборье күрэхтэһиитигэр Таатта уола Владимир Михайлов бастаан, кыһыл көмүс мэтээли түөһүгэр кэтэн килбэчиттэ! Үрүҥ көмүс мэтээл хаһаайынынан Николай Николаев (Бүлүү), боруонса мэтээл хаһаайынынан Артем Ветров (Дьокуускай) буоллулар, бириистэрин улуус баһылыга Степан Кузьмин туттарда.

Салгыы биһиги уолаттарбыт Леонид Попов хапсаҕайга бастакы уонна Константин Жирков мас тардыһыытыгар иккис миэстэлэри ыллылар, үөрүүнү үксэттилэр.
Оттон саха тыллаах, туой иһиттээх, туос маллаах, тимир тэриллээх биһиги өбүгэлэрбит үгэстэрин умнубакка илдьэ сылдьар уустарбыт, тыл-өс күүрээннээх киирсиилэригэр кыттааччылар хоммут уостарын хоҥнорон, өрөөбүт уостарын өһүлэн ууларыгар-хаардарыгар киирэн, бастыҥтан бастыҥы быһаарар биэтэккэ маннык түмүктэри көрдөрдүлэр:
1 үрдэл:
•.Тимир уустарыгар ат уостуганын, боккуобун, иҥэһэтин оҥорууга күөн-күрэс — Сарыал Билюкин.
• Биирдиилээн олоҥхо толоруутугар оҕолорго кыайыылаах Никита Лукин
• Олоҥхону тута хоһуйууга Алексей Николаев.
• Дьиэ-кэргэнинэн саха таҥаһа — Аргуновтар дьиэ-кэргэн.
• Туой оҥоһук-тарга оҕолорго кыайыылаах Айта Степанова.
2 үрдэл:
• Күөс иһитин, көһүйэни оҥоруу — Николай Степанов.
• Дьиэ-кэргэнинэн хомуска күөн-күрэс — Аргуновтар дьиэ кэргэн.
3 үрдэл:
• Олоҥхону биирдиилээн толорууга — Людмила Цой.
• Улахан дьоҥҥо бөлөҕүнэн олоҥхону толорооччулар күөн-күрэстэрэ — «Кылыһах» бөлөх. Салайааччы Галина Полускина.
• Сахалыы оҥоһуулаах ох саа — Леонид Васильев
• Ох саанан ырааҕы ытыы — Леонид Васильев.
• Чабырҕаҕы бөлөҕүнэн толорууга — «Билбит-көрбүт кыргыттар» дуэт Жанна Бурмистрова, Прасковья Татаринова.
• 36 сааһыттан үөһээ улахан дьоҥҥо оһуохай этээччилэрин күөн күрэһэ — Афанасий Попов.
Анал ааттар:
• Устин Нохсоров аатынан анал бириис — Афанасий Попов.
• Туос оҥоһуктарга күөн күрэс — «Уран оҥоһук» Парасковья Бурнашева.
• Туос оҥоһуктарга күөн-күрэс — «Силигэ сиппит айымньы» Валерия Потапова.
• Чабырҕахсыттар күөн-күрэстэрэ «Иннэ элэкис, манна мэлэкис» — Алена Сабарайкина.
• Биирдиилээн олоҥхо толорууга «Олоҥхо тылын ууһа» Галина Полускина
• Аныгылыы тупсарыллыбыт сахалыы уонна хотугулуу истииллээх күннээҕи уонна мааныга кэтиллэр таҥастар коллекциялара — «Сонун көстүү» Марианна Степанова.
• «Олоҥхо ырыатын дэгэтэ» — Удьуор утум Луукуннар дьиэ-кэргэн.
• Эдэр ыччаттарга олоҥхо толоруутугар Ил Түмэн анал аата — Арчыман Номоҕон.
• Олоҥхону толорооччулар күөн күрэстэрэ — «Түөлбэ үгэһин утумнааччы» Альберт Шестаков.
• Олоҥхону толорооччулар күөн-күрэстэрэ «Сэһэн сүнньүн тутааччы» — «Дьохсоҕон олоҥхоһуттара». Салайааччы Афанасий Попов
• Олоҥхону толорооччулар күөн-күрэстэрэ «Олоҥхо этиитин тэтимэ» — «Дьолуо» бөлөх. Салайааччы Людмила Цой.
• Оһуохай этээччилэргэ (ыччаттар) — «Кэскиллээх этээччи» Илья Наумов.
• Оһуохай этээччилэргэ (ыччаттар) — «Уран тыллаах хоһуйааччы» — Иван Иванов.
• Олоҥхону биирдиилээн толорууга — Ырыа Маппый анал бирииһэ Александр Багардынов
Икки күн устата тохтоло суох ыытыллар 80-тан тахса араас тэрээһини 15 тыһыынчаттан тахса ыалдьыт, кыттааччы, тэрийээччи көрдө. Түмүккэ ыһыах тэрийэр хамыыһыйатын бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Сергей Местников уонна Амма улууһун баһылыга Степан Кузьмин Ытык дуоҕаны эһиил ыытыллар Олоҥхо ыһыаҕын хаһаайыныгар — Нерюнгри улууһун баһылыгар Роман Щегельнякка туттардылар.