«Балаҕан ыйын 24 күнүгэр Ил Дархаммыт Айсен Сергеевич Николаев Судаарыстыбаннас күнүгэр анаммыт быһа эпиирын сэҥээрэ сэргээн көрдүбүт, иһиттибит.
Ил Дархан быһа биэриитигэр Талыы Талба Тааттабыт хоһун буойунугар Родимир Максимовка-Бурхаатка алтынньы ый 4 күнүгэр Дойду килбэйэр киинигэр Москва куоракка Герой знагын туттарылларын бэлиэтээтэ. Республикабыт социально-экономическай сайдыытын, былааннарын сырдатта, ол курдук Өлүөнэ Эбэбитин туоруур муоста тутуутуттан саҕалаан, хаарбах дьиэттэн көһөрүү программатын, үөрэх эйгэтигэр кыра нэһилиэктэр оскуолаларын саптарбат туһунан, тыа хаһаайыстыбатын сүрүн боппуруостарын таарыйда.
Айсен Сергеевич этиититтэн тыа хаһаайыстыбатын таарыйан ылыым. Тыа хаһаайыстыбаларын боломуочуйалара улууска 2012 сыллаахтан саҕаламмыттара. Ил Дархан быһа эпииригэр тыа хаһаайыстыбатыгар бэриллэр субсидия биир суума буолан улууска бэриллиэ, ол сууматын улуус бэйэтэ көрөн быһаарыа диэн эттэ. Биһиги тыабыт хаһаайыстыбатынан үлэлээн-хамнаан олорор улууспут. Быйылгы 2024 сыллаах улууспут бюджетыгар тыа хаһаайыстыбатын программатыгар бу иннинэ көрүллүбэтэх, икки бүктэн ордук элбэх үбү көрөн олоробут. Онно өссө эбии күүс буолуо «О наделении органов местного самоуправления муниципальных районов и городских округов Республики Саха (Якутия) отдельными государственными полномочиями по поддержке сельскохозяйственного производства» диэн региональнай сокуоҥҥа уларыйыы киириитэ. Бу саҥа киирээри турар тыа хаһаайытсыбатын механизымын маннык быһаарда, улуустарга субвенциянан тыа хаһаайыстыбатыгар кэлэр үбү муниципальнай оройуон бэйэтэ көрөн ханнык хайысхаҕа ыытарын быһаарар буолар. Бу олус сөптөөх быһаарыныы дии саныыбын. Тоҕо диэтэргин, улуус улуустар араас хайысхаҕа болҕомто уураллар, оҕуруот аһын үүннэриитэ, бурдук үүннэриитэ, куурусса иитиитэ, үүт-эт оҥорон таһаарыыта уо.д.э.
Онон бу механизм үлэҕэ киирдэҕинэ улуустар, куораттар тыа хаһаайыстыбатын бородукциятын күүскэ сайыннарыахтара диэн эрэнэбин», диир Таатта улууһун депутаттарын Сэбиэтин бэрэссэдээтэлэ Петр Максимов.
«Таатта» хаһыат.