Тааттаҕа саҥа поликлиника куйаар ситиминэн дойду Аҕа баһылыга Владимир Путин алгыһынан үөрүүлээхтик аһыллыбыта оруобуна биир сыл буолла. Коллектив билигин 109 үлэһиттээх, ол иһигэр 33 быраас, 65 орто анал үөрэхтээх эмчиттэр. Балар ортолоругар 10 РФ уонна 29 СӨ доруобуйатын харыстабылын туйгуннара үлэлииллэр.
Поликлиникабыт бүгүҥҥү күҥҥэ сэрэтии бары көрүҥүн, диагностика уонна эмтээһин арааһын оҥоро олорор. Сүрүн специальностартан ураты неврология, эндокринология, кардиология, нефрология, гастроэнтерология, онкология курдук салаалар улууспут олохтоохторун хааччыйаллар.
Ол курдук, нэһилиэнньэни сэрэтэр быһыыларынан хабыы, улахан дьоҥҥо, оҕолорго, тулаайах уонна көрүүтэ суох хаалбыт оҕолорго диспансернай уонна сэрэтэр көрүүнү оҥоруу, эминэн туһаныыга чэпчэтиилээх дьону босхо эминэн хааччыйыы курдук элбэх күүһү, сыраны эрэйэр, күннэтэ быыстала суох үлэлэр ситиһиилээхтик оҥоһулла тураллар. Ону кытта дьүөрэлээн саҥа эмтиир уонна чинчийэр ньымалары киллэрии тиһигин быспакка барар.
Поликлиникабыт бары специалистарынан: врачтарынан, орто анал үөрэхтээх эмчиттэринэн толору хааччылларыгар былааннаах үлэ ыытыллар. Иллэрээ сыл Ытык Күөл 1 №-дээх оскуолатын иһинэн Медицинскэй кылаас арыллан, профориентационнай үлэ эрдэттэн саҕаланар буолла. Быйыл күһүн поликлиникабыт иһинэн В.А.Вонгродскай аатынан Дьокуускайдааҕы медицинскэй колледж филиала арыллан, сиэстэрэ идэтигэр 20, биэлсэр идэтигэр 18 студент үөрэнэ сылдьаллар. Киһини үөрдэрэ манна эрдэттэн балыыһаҕа үлэлии сылдьыбыт, олохтоох, дьиэлээх-уоттаах дьон үөрэнэ сылдьаллара буолар. Билигин целевойунан медицинскэй институттарга барыта 33, орто анал үөрэххэ 39, клиническэй ординатураҕа 2 оҕону үөрэттэрэ сылдьабыт. Быйыл саҥа рентгенолог, 2 сиэстэрэ поликлиникаҕа үлэлии кэллилэр.
Бу сыл 10 ыйыгар поликлиникаҕа барыта 94 000 тахса прием оҥоһулунна. Оборудованиенан толору хааччыллыбыт физиокабинекка 3500 тахса процедура оҥоһулунна. 760 киһи компьютернай томограбы, 550 киһи эндоскопия, 2300 киһи УЗИ араас чинчийиилэрин аастылар. 12000 тахса киһи рентгеҥҥэ түстэ, онтон 1725 киһитэ көһө сылдьар флюороаппаракка нэһилиэктэргэ бэйэлэригэр түстүлэр. Лаборатория 400 тыһ. тахса араас аналиһы оҥордо, ол иһигэр ПЦР анализтары, 20 тыһ. тахса сэрэтэр көрүү араас көрүҥэ оҥоһулунна.
Эһиил ыытыллар «Манчаары оонньууларыгар” анаан эмчиттэри уонна тэрийээччилэри бастакы медицинскэй көмөнү оҥорорго үөрэтии, айан суолун устун уонна спортивнай объектар тастарыгар анал медпууннары тэрийии, олору эминэн, оборудованиенан хааччыйыы, сэрэтэр быһыылары былааннааһын уонна оҥоруу курдук үгүс ахсааннаах тэрээһин үлэлэрэ былаан быһыытынан ыытылла тураллар. Манна улуус уонна доруобуйа харыстабылын министерствотын өттүттэн тэрийэр, методическай уонна үбүнэн көмө оҥоһулла турар.
Онон саҥа тэриллэринэн сэбилэммит саҥа поликлиника үлэҕэ киирэн олохтоохтор да, үлэһиттэр да абыраннылар. Дьиэ-уот ырааһа, сылааһа, усулуобуйа тупсубута элбэҕи быһаарар.
Маны таһынан үрүҥ халааттаах аанньалларбыт дьоҥҥо-сэргэҕэ сайаҕас сыһыаннарынан, сатабылларынан, кыһамньыларынан хайҕабылы ылалларын сэргэ улуус общественнай олоҕор кыттыылара эмиэ баһаам. Ол курдук улуус кылаабынай бырааһа Сардана Владимировна Кононова дойду бары эрэгийиэннэрин хабар «Арассыыйа лиидэр дьахталлара» түмсүүгэ киирэн, кинилэр көҕүлээһиннэринэн анал байыаннай дьайыы кыттыылаахтарыгар көмөлөһөр сыаллаах «Дьиэҕитигэр күүтэллэр» сонун бырайыагы үлэлэтэн саҕалаатылар. Ытык Таатта сиригэр бу бырайыак үлэтин саҕалаан, тоҕус анал байыаннай дьайыы кыттыылааҕар уонна кинилэр дьиэ кэргэттэригэр туһааннаах көмө оҥоһуллубута. Балыыһа коллектива анал байыаннай дьайыы саҕаланыаҕыттан уоппускаҕа кэлэр буойуттары барыларын доруобуйаларын туругун көрөн, диспансеризацияны ыыта олорор. Оттон медколледж студеннара СВО-ҕа сылдьар биир дойдулаахтарбытыгар сылаас таҥаһы, дойдуларын аһыттан хомуйан баһыылка ыыппыттара.
Мария СЕМЕНОВА, улуус кылаабынай бырааһын солбуйааччы.