Биһиги бүгүн кэпсиир дьоруойбут Таатта улууһун үөрэҕин салалтатын начальнига Владимир Владимирович Кривошапкин буолар. Кини сылтан ордук кэмҥэ хорутуулаахтык үлэлээн бэйэтин суолун-ииһин булунна. Дьиҥнээх салайааччы, кыахтаах тэрийээччи, туруу үлэһит, сахалыы сиэрдээх киһилии киһи. Үөрэх үлэһиттэрин дириҥ билиниилэрин ылыан ылла.
Харбалаахха үөрэхтээһин киинин тэрийэн, нэһилиэк, улуус, куорат салалталарын кытта бииргэ үлэлиир сыһыаны олохтообута. Оскуола ыытар тэрээһиннэригэр куруук көҕүлээччи, тэрийсээччи быһыытынан учууталлары кытта тэҥҥэ сылдьар салайааччы. Үлэһиттэр олорор усулуобуйаларын тэрийиигэ, тэрилтэ хаһаайыстыбалаах буолуутугар улахан болҕомтону ууран үлэлэһэр.
Улуус үөрэҕин салалтатын салайааччытынан Аиза Николаевна Миронова курдук улахан салайааччы кэнниттэн күүстээх санаанан үлэҕэ ылсыбыта. Быйылгы ыытыллар Педагог уонна Уһуйааччы сылыгар улууска сонун тэрээһиннэр буоллулар. Үөрэх хаачыстыбата үрдүүрүгэр улахан болҕомто ууран, хас биирдии оскуолаҕа педсоветтары тэрийэн, кыһалҕалары ырытыһан, биирдиилээн кэпсэтэн, дьоһуннаах туһаайыылары киллэрэн, сыал-сорук туруоран үлэтин сонуннук саҕалаабыта.
Быйыл сайын хаһан да буолбатах улахан өрөмүөннэр Ытык Күөл оскуолаларыгар ыытылыннылар. Чымнаайыга, Дьохсоҕоҥҥо, Уолбаҕа оскуола дьиэлэрэ хаарбах туруктанан сабыллыбыттара. Манна начальник унньуктаах санаатын ыһыктыбакка, сатабыллаахтык салайан, уонтан тахса дьиэни нэһилиэк дьаһалталарын кытары бииргэ үлэлэһэн, булан-талан, өрөмүөн оҥорторон, оҕолор саҥа оскуолалар тутуллуохтарыгар диэри үөрэнэр сирдэрин кэмигэр тэрийдэ. Ол барыта СӨ үөрэҕин уонна билимин министиэристибэтин материальнай-техническэй баазаны тупсарыыга салаатын кытта ыкса үлэни тэрийии, элбэх сүүрүү-көтүү түмүгэр бырагыраамларга үлэлэһии үтүө түмүгүнэн буолла. Онон, Алампа аатынан оскуола, Д.А. Петров аатынан оскуола ис сэбэрэлэрэ биллэ сэргэхсийдэ. Үөрэх начальнигын быһаччы дьаһалынан үлэ эрдэттэн ыытыллан, ааҕынан-суоттанан, ыллыктаах тылынан салайан, эксээмэннэр Чөркөөх оскуолатыгар бэркэ тэрилиннилэр. Эксээмэни тэрийиигэ үөрэх салалтата эппиэтинэстээхтик сыһыаннаһан, үлэни тэрийии бастыҥ холобурун көрдөрдүлэр. Оскуоланы бүтэрээччилэри оптуобустарынан хааччыйыыга улуус иһинэн массыыналары графигынан анаан, учууталлары аттаран, онуоха айылҕа араас моһоллорун туораан, ыпсарыылаахтык дьаһайан барыта этэҥҥэ түмүктэммитигэр педагогтар, төрөппүттэр истиҥ махталларын ыллылар.
Быйыл саас Таатта үрэҕинэн сүрдээх элбэх уу кэлэн ааста. Ытык Күөлгэ оҕо ууга түһэн, сүүрүккэ оҕустаран тимирэн эрэрин ыраахтан көрөн, муустаах тымныы уу диэбэккэ харбаан киирэн, оҕону быыһаан, хорсун быһыыны оҥорон, бука бары махталбыт улахан. Урукку сылларга үөрэх салаатын начальнига Атос Реасович Кулаковскай олохтообут педагогтар ыһыахтарын сөргүтэн учуутал аймах сүргэтэ көтөҕүлүннэ. Олохторун иитиигэ-үөрэтиигэ анаабыт Ытык дьоммут ыһыахха ыҥырыллан, бэйэ-бэйэлэрин кытта көрсүһэн, үөрэн-көтөн барбыттара туохха да тэҥнэммэт үөрүүнэн буолар.
Оҕолор сайыҥҥы сынньалаҥнарын тэрийиигэ Таатта улууһа үчүгэй тэрийээччилэр ахсааннарыгар сылдьар. Быйыл Чычымахха Унньуулалаах хочоҕо Атос Реасович Кулаковскай аатынан стационарнай лааҕыр бастакытын үлэлээтэ. Онно А.Е. Мординов аатынан Тааттатааҕы лиссиэй “Умсулҕан” лааҕыра иккис сезоҥҥа тылга оҕолору дьарыктаата. Бу лааҕыр өрөспүүбүлүкэҕэ соҕотох литератуурунай лааҕыр буоларын үөрэх уонна билим министиэристибэтин хамыыһыйата бэлиэтээн, начальник Андросова О.П. СӨ Ил Дархана Айсен Николаевтан махтал суругу, СӨ үөрэҕин уонна билимин миниистириттэн бочуотунай грамотаны тутта. Бу курдук төрөөбүт Ийэ тылы-өһү сайыннарыыга үлэ Тааттаҕа ыытыллара болҕомто киинигэр турар.
Ааспыт үөрэх дьылыттан саҕалаан, оҕо кинигэни ааҕара аччаабытыттан сылтаан, “Күн” түмсүү тэриллибитэ, бэрэссэдээтэлинэн И.А. Сивцева талыллыбыта. Сайыҥҥы сынньалаҥ кэмигэр бэриллибит айымньылары Уус Таатта, Чөркөөх, Тааттатааҕы лиссиэй оскуолаларын оҕолоро аахтылар.
Учуутал күнүгэр Таатта улууһун педагогтарыгар улахан бэлэҕи А.Е. Мординов аатынан Тааттатааҕы лиссиэй учуутала, дириэктэри иитэр үлэҕэ солбуйааччы В.Ю. Михайлова өрөспүүбүлүкэҕэ биэс бастыҥ учууталлар ахсааннарыгар киирэн оҥордо.
Владимир Владимирович бары сатабылын, билиитин-көрүүтүн туһанан салгыы салайыа, онуоха улуус дьаһалтатын өттүттэн өйөбүл баар. Таатта биир сомоҕо буолан үлэлииригэр кэнэҕэски кэнчээри ыччаппыт инникитэ хас биирдиибититтэн тутулуктаах.
Оксана Андросова, Арассыыйа суруналыыстарын Сойууһун чилиэнэ, РФ Үөрэҕириитин Бочуоттаах Үлэһитэ.