Олунньу 25 күнүгэр Дьокуускай куоракка, “Триумф” спорт уораҕайыгар “Сила в единстве” диэн Россияҕа аан бастакынан норуот акцията ыытылынна.
Бу акция сыала-соруга диэн араас көлүөнэ дьону түмүү, сомоҕолооһун, культураны төрүт үгэһи кытта ситимнээһин уонна сүрүн социальнай боппуруостарга болҕомто ууруу.
Бу улахан тэрээһиҥҥэ Д.К. Сивцев-Суорун Омоллоон аатынан государственнай опера уонна балет театрын солистара, С.А. Зверев- Кыыл Уолун аатынан национальнай үҥкүү театрын артыыстара, “Вальс Победы” фестиваль кыттыылаахтара, Дьокуускай куораттан үҥкүү ансаамбыллара, Саха сирин улуустарыттан уонна Дьокуускай куораттан мустубут хоровой коллективтар — бары түмсэн, биир тэҥинэн Россия уонна Саха Республикатын гимнарыттан саҕалаан уопсайа 15 патриотическай ырыаны балтараа чаас устата атахтарыгар туран эрэ толордулар! Ону таһынан Республикаҕа биллэр уран уустар, сахалыы музыкальнай инструменнары оҥорор маастардар атыы- быыстапка тэрийдилэр.
Таатта улууһуттан Ытык Күөл аҕам саастаахтарын хора кыттан, Лауреат үрдүк аатын ылан, хор салайааччыта Карл Иванович Христофоров “Лучший концертмейстер” анал аат хаһаайына буолан, улахан ситиһиилэнэн кэллилэр!
Чычымахтан эр дьон ансаамбыла Саха сирин норуодунай артыыһа Александр Емельянов солистаах, Данил Егорович Афанасьев – Талба тылларыгар уонна матыыбыгар, Инна Скрыбыкина оркестровкатыгар “Киэн тутун” диэн ырыаны толордулар.
Бу тэрээһинтэн киирбит үп байыаннай дьайыы кыттыылаахтарын өйүүр фондаҕа барар.
Сарыал Кыыма