Тааттатааҕы спорткомитет салайааччыта Ньургун Михайлович Сабарайкин иһитиннэрбитинэн нэдиэлэтээҕи спорт ситиһиилэрэ:
Петр Алексеев аатынан өрөспүүбүлүкэҕэ бастыыр иһин хапсаҕай күрэҕэр 21 хамаанда кыттыбытыттан Таатта хамаандата — 2 миэстэ, бэтэрээннэргэ Николай Иванов (70 кг. диэри) — 2 миэстэ буолары ситистилэр.
Чэпчэки атлетикаҕа өрөспүүбүлүкэҕэ бастыыр иһин Роман Алексеев (8 км.) — 1 миэстэ, Күннэй Бурнашева (4 км.) – 2 миэстэ, бэтэрээннэргэ Альберт Варламов (5 км.) – 1 миэстэ буоллулар.
Томпо маастардарын өрөспүүбүлүкэтээҕи турнирыгар Таатта улууһа 20-чэ мэтээли ылар чиэскэ тигистэ, Василий Чемпин (75 кг. диэри) абсолютнай чөмпүйүөн аатын сүгэн, 100 тыһ. солк. наҕараадаланна. Буулдьа саанан ытыыга өрөспүүбүлүкэтээҕи турнирга Таатта хамаандата – 3 миэстэни ылла.
Уолбаҕа Иннокентий Кочкин аатынан көҥүл тустуу аһаҕас өрөспүүбүлүкэтээҕи турнирыгар 80 кыттааччы көхтөөх кыттыыны ылла. Игидэйгэ нэһилиэктэр икки ардыларынааҕы комплекснай спартакиадаҕа Игидэй – 1 м., Уолба – 2 м., Тыараһа – 3 м. буоллулар.
Мария Павлова.