Төрөөбүтэ 140 сылыгар анабыл.
Силэпсиэптэр, Сиипсэптэр
Сыдьааннара буоламмыт,
Сиэллээх ууһуттан силистээх
Сиипсэп Сүөдэр аҕабыт
Сүдү үөрэхтээх учуутал,
Сүүс түөрт уон сылыгар,
Сырдык, үтүө аатыгар
Сүгүрүйэн кэллибит…
Саха сирэ сайдарыгар,
Саха дьоно үөрэхтэнэригэр
Сүҥкэн кылаатын киллэрсэн,
Сыралаһан турууласпыт
Сүдү өркөн өйдөөҕө
Саха саарына КИНИ эбит!
Саманнык чулуу дьоннорбут
Сымыйаҕа балыллан
Саастарын үгэнигэр сылдьан
Суорума суолламмыттара
Сүрүкэтин, оо, абатыан!
Дьэ, киинэ түспүт сиригэр,
Дүллүкүтүн алааһыгар
Дьоһун Мэҥэ турдар ханнык
Дьиҥнээх Улуу Киһиэхэ!
(2015 с. бэс ыйа. Чөркөөх сэлиэнньэтэ)
В.Харайданова-Эбээ Валя.
Дьохсоҕон. «Куорсун» айар түмсүү. Таатта улууһа.
PS: Сахалартан бастакы таҥара үлэһитэ үөрэхтээх миссионер Федор Гаврильевич Сивцев-Сүөдэр аҕабыыт Боотурускай улуус II Дьохсоҕон нэһилиэгэр сэниэ ыалга төрөөбүтэ. 1890 с. духовнай семинария бэлэмнэнии кылааһыгар киирбитэ, онтон салгыы семинарияҕа А.Е.Кулаковскайдыын бииргэ үөрэммитэ. Кини таҥара кинигэлэрин сахалыы тылбаастаабыт улахан үтүөлээх. Дойдутугар церковнай-приходской оскуолаҕа саха оҕолорун сахалыы үөрэтэргэ холоммута. Революция кэнниттэн типографияҕа, Охотскайга “Якутторг” боломуочунайынан үлэлээбитэ. Ксенофонтовщина дьыалатыгар репрессияҕа түбэһэн, Соловкига 1929 с. алтынньыга өлбүтэ.
Бу Сүөдэр аҕабыыт В.П.Харайданова аймаҕа эбит, Сүөдэр аҕабыты кытта кини хос эбэтэ Сивцева Ирина Гаврильевна бииргэ төрөөбүт.
Бэчээккэ ыытта автор көрдөһүүтүнэн библиотекарь Другина ГН.