Бүгүн П.А.Ойуунускай аатынан Судаарыстыбаннас музейыгар «Таатта спордун туонатыгар — чөркөөхтөр» быыстапка аһылынна. Быыстапкаҕа Былатыан Ойуунускайтан саҕаламмыт спорт сайдыыта, нэһилиэкпитигэр олорон ааспыт күүстээх-уохтаах дьону үйэтитии, билиҥҥи күрэхтэһии туонатыгар ситиһиилээхтик кыттыбыт, кытта сылдьар дьоммут-сэргэбит, кэнчээри ыччаттарбыт ситиһиилэрэ көрдөрүллэллэр.
Тэрээһини музей үлэһитэ Анна Борисова хомоҕой тылынан иилээн-саҕалаан ыытта. Музей сэбиэдиссэйэ М.Г.Аржаков сүрүн дакылааты оҥордо. Нэһилиэкпит историятын үөрэтэр, чинчийэр П.Ф.Кычкина баай ис хоһоонноох иһитиннэриитэ, маны сэргэ олохтоох библиотека сэбиэдиссэйэ Т.А.Бодоготова мас тардыһааччылар тустарынан, А.Т.Таппыров аҕатын Тихон Семенович, убайа Мэндэ Тихонович туһунан ахтыыны, Р.В.Таппырова дьиэ кэргэнинэн саахымакка дьарыктарын, музей үлэһиттэрэ биирдиилээн экспонаттары, стендэлэри кэпсээтиилэр. Фонда хранителэ Д.Ф.Кириллина бэлиэтээбитинэн, бу быыстапкаҕа олохтоохтортон 923 предмет быстах кэмҥэ харалла киирбит. Бу предметтэр бары учуоттанан, нүөмэрдэнэн быыстапкаҕа уурулуннулар. Манна сырдатан аастахха, Мэндэ Таппыров кыыһа Римма Мендеевна аҕатын 33 малын музейбытыгар бэлэхтээтэ. Олор истэригэр Чөркөөх оҕолорун саахымат мындыр үөрэҕэр уһуйбут истиэнэҕэ ыйанар улахан саахымат дуоската баар. Түгэнинэн туһанан Римма Мендеевнаҕа улахан махталбытын тиэрдэбит. Быыстапка аһыллыытын үөрүүлээх түгэнинэн улуустааҕы спорт управлениетын салайааччыта А.П.Сидоров, Октябрьскай нэһилиэк баһылыга А.П.Семенов эҕэрдэлээтилэр. Улууспутугар спорт сайдыытын көрдөрөр Анатолий Мурунов стендэлэрэ, чөркөөхтөр киэҥ туттар биир дойдулаахпыт Илларион Федосеев аан дойду таһымыгар бастакынан чөмпүйүөн буолан ылбыт мэтээлэ быыстапка ис хоһоонун байытта. Маҥы тэҥэ быыстапкаҕа удьуор саахыматчыт Таппыровтар, тустуу, мас тардыһыы көрүҥэр бастыҥ көрдөрүүлээх Аввакумовтар, өрөспүүбүлүкэ волейболга сүүмэрдэммит хамаандатын тренерэ Айсен Жерготов уо.д.а. биллэр-көстөр спортсменнарбытын көрүөххэ, билсиэххэ сөп.
Светлана Халгаева.