Тохсунньу 4-8 күннэригэр Новосибирскайга 25 төгүлүн ыытыллар Сибиирдээҕи хаар оҥоһуктар фестиваль-күрэхтэригэр Россия араас муннуктарыттан барыта 12 хамаанда мустан күөн көрүстэ. Быйылгы үбүлүөйдээх күрэх тиэмэтэ – “Россия өрүстэрэ”.
Хамаандалар эрдэттэн толкуйдаабыт эскизтэринэн оһуордаан-мандардаан, ким тарбаҕын талаана, өйө-санаата төһө тиийэринэн көрүөхтэн кэрэ, сөҕүмэр оҥоһуктары оҥорон таһаардылар. Олор истэригэр чубуку турар очуос хайаларыгар охсуллар дохсун өрүс баала, оһуорга кубулуйбут долгуннар, таас хайаҕа ойууламмыт былыргы уруһуйдар, саха хомуһа уонна араас өрүстэр иччилэрэ дьахтар уобараһынан хаарга хоһуллан билигин Новосибирскай куораты киэргэтэн дьон-сэргэ биһирэбилин, сөҕүүтүн-махтайыытын ыла тураллар.
Бу күрэххэ үһүс миэстэни Новосибирскай, иккис миэстэни Омскай хамаандата, бастакы миэстэни Новосибирскай хамаандата ыллылар. Оттон муҥутуур кыайылаахтарынан, Гран-при хаһаайыннарынан Тааттаттан Афанасий Варфоломеев уонна Новосибирскайтан Валерий Симаков холбоһуктаах “Грань” хамаандалара буолан, “Лена – улахан өрүс” композиция Новосибирскай мэрин анал бирииһинэн наҕараадаланна.
Афанасий Афанасьевич Варфоломеев өр сылларга Саха Өрөспүүбүлүкэтин судаарыстыбаннай хааһынатын тэрилтэтэтигэр «Саха өрөспүүбүлүкэтин үлэҕэ уонна социальнай сайдыыга Министиэристибэ Тааттатааҕы нэһилиэнньэ социальнай көмүскэлин кэлим киинигэр» (уруккутунан “Эрэл” сокуоннай саастарын ситэ илик оҕолору реабилитациялыыр киин) уһуйааччынан үлэлээн кэллэ. Кини үлэтигэр сүрүн болҕомтону уол оҕону эр киһи, дьиэ кэргэн аҕа баһылыга гына иитэн таһаарарга уурар. Ол курдук иитиллээччилэрин маһынан уһанарга, мууһунан, хаарынан, бэл диэтэр туойунан оҥоһук оҥорорго үөрэтэр, эр киһи араас үлэтигэр иитэр-такайар.
Талба талааннаах биир дойдулаахпытыгар инникитин даҕаны ситиһии сиэттиһэн кэлэ турдун!