«Таатта сирэ «таалар налыы…» эрэ буолбатах, түһүүлээх-тахсыылаах, иччилээх-идэмэрдээх, хомуһуннаах-холоруктаах дойду. Саха үгэһэ, саха итэҕэлэ буоругар кытта иҥмит дойдута: дьиҥ саха тыата, саха алааһа, тыымпыта, чараҥа – салгынныын атын дойду!» диэбитэ саха саарына, биир дойдулаахпыт В.Н. Протодьяконов.
Дэлэҕэ даҕаны, Игидэй Дьиэрэҥнээҕэр поляк Э.К. Пекарскай уон аҕыс сыл устата сыылкаҕа олорон саха тылын анаан үөрэппитэ, аан дойдуга аатырар Саха тылдьытын оҥорбута. Маны сэргэ кини Таатта олоҥхоһуттарын тылыттан тиһэн хомуйбут үлэлэрин «Образцы народной литературы якутов» маҥнайгы томугар киллэрбитэ. Оттон бары ытыктыыр киһибит Б.Ф. Неустроев — Мандар Уус Тааттабыт биир дьаралыгар – гербэтигэр – орто дойду олоҕун араҥаччылыыр олоҥхо Аал-Луук маһын киллэрбитэ эмиэ ураты суолталаах дии саныыбын.
Тоҕус томторҕолоох
Тойон айах курдук
Лоһуор көмүс туорахтаах,
Тыала суохха тыалыран
Салыбырыы-илибирии турар,
Салгына суохха салгыдыйан
Салыбырыы-илибирии турар,
Кытыт биэ тириитин тиирэ тардан
Кыаһаанныы ыйаан кычымнаабыт курдук
Нэлэмэн көмүс сэбирдэхтээх,
Айдам-аарык аҕыс салаалаах
Аар-луук мас диэн
Ананан айыллан үөскээбит эбит…
(Б. Ойуунускай «Дьулуруйар Ньургун Боотур» олоҥхотуттан)
-2009 сыл тохсунньу 29 күнүгэр Таатта улууһун депутаттарын Сэбиэтин 7-2 нүөмэрдээх быһаарыытынан Таатта улууһун былааҕа бигэргэммитэ. Былаах эскиһэ үөһэ ахтыллыбыт ытык убайдарбыт санааларыгар тирэҕирэн оҥоһуллубута. Улуус былааҕа муниципальнай-правовой статус бэлиэтэ, улуус историятын, төрүт үгэһин, дьарыгын, култууратын, духуобунаһын кэрэһилээн көрдөрөр.
- Таатта былааҕа сытыары түөрт өҥтөн турар.
- Сүрүн өҥө – чээлэй от күөҕэ – киирбэт күннээх чаҕылхай кылгас сайыннаах, талах мас курдаах, кэхтибэт күөх быйаҥнаах Тааттаны кэрэһилиир.
- Былаах ортотугар үрүҥ күн — ойон тахсар күннээх, ыраас тыыннаах тымныы дойдубут муудараһын, ырааһын, кэрэтин бэлиэтэ.
- Үрүҥ күн ортотугар олоҥхоҕо этиллэринэн «сир киинигэр үүнэр Айыы аймах биһигэ, үрдүк үрүҥ айыылар уйалара», саха норуотун ытык маһа олоххо тардыһыыны, духуобунай-култуурунай баайы, сайдыыны көрдөрөр.
- Аал-Луук мас – биир сомоҕо буолуу, баараҕадыйыы, түмсүү бэлиэтэ. Мас икки өттүнэн үөһээ өрө үүнэн тахсыбыт уон түөрт лабаа Тааттабыт уон түөрт нэһилиэгин ахсаанын ыйар.
- Аал-Луук мас лабааларын аллараа намылыйбыт сэбирдэхтэрин үс салбахтара үс саха кэлэр кэнчээритин, кэскилин уонна уран тылын мэктиэлиир.
- Халлаан күөҕэ өҥнөөх сурааһын аан дойду символикатыгар чиэс, эрэл, үтүө санаа өҥө буолар.
- Үс маҥан өҥнөөх дьураалар Таатта сиринэн устар, уйгулаах-быйаҥнаах үс ытык эбэни – Тааттаны, Амманы, Алланы ойуулаан көрдөрөллөр.
- Былаах аллараа өттө хараҥа от күөҕэ өҥнөөх. Бу өҥ Аан дойдуга түүр омук бэлиэтинэн биллэр. Онон саха омуга түүр омуктан тардыылаах тыллаах-өстөөх буоларын туоһулуур.
Улуус официальнай былааҕа – бэйэни салайыныы мэктиэтэ. Былаах былааһы, норуоту түмэр, патриотическай тыыны киллэрэр дьаралык буолар. Былаах эн көҥүлгүн, сиргин-уоккун сокуонунан көмүскүүр кыахтаах. Былаах ситиһиигэ, кыайыыга сирдиир сүдү күүстээх.
А. Лопатин, Таатта улууһун муниципальнай былааҕын ааптара