Бу сыл балаҕан ыйын 7-8 күннэригэр П.А.Ойуунускай төрөөбүтэ 130 сылыгар аналлаах «Мин туйгун норуотум -айар күүс кыһата» култуура-үөрэхтээһин форума Таатта улууһун Чөркөөхтөөҕү политсыылка түмэлигэр ыытыллар. Форум чэрчитинэн оҕолорго өрөспүүбүлүкэтээҕи Ойуунускай ааҕыылара уонна иис-уус дьоммутун түмэр тэрээһиннэр тэҥинэн ыытыллаллар.
Форум аһыллыытын үөрүүлээх тэрээһинэ Былатыан Ойуунускай төрөөбүт сиригэр Муҥха Дэлбэрийбит алааһыттан саҕаланна. Сарсыардаттан манна өрөспүүбүлүкэ араас улууһуттан Ойуунускай ааҕыыларыгар кытта кэлбит оҕо-аймах, форум кыттааччыларынан алаас күйгүөрэ түстэ. Аҥардас куонкуруска 266 оҕо кыттарга суруйтарбыт. Ол курдук Нерюнгриттан, Үөһээ Бүлүүттэн, Томпоттон, Өймөкөөнтөн уо.д.а. улуустартан тиийэ кэлбиттэр. Тэрээһиҥҥэ СӨ Үөрэххэ министрэ Ирина Любимова, СӨ култуураҕа миниистирин бастакы солбуйааччыта Афанасий Ноев, норуот депутаттара Виктор Лебедев, Павел Пинигин, улуус баһылыга Михаил Соров кыттыыны ыллылар, эҕэрдэ сылаас тылларын, бастыҥ үлэһиттэргэ наҕараада туттардылар.
Тэрээһин биир саамай бэлиэ түгэнинэн Былатыан Ойуунускай төрөөбүт алааһыгар туоруур тимир муостаны аһыы сиэрэ-туома ыытыллыбыта буолла. Бу Ойуунускай төрөөбүт күөх сирэм алааһыгар туоруур, күн уотуттан ититиллэр лаампалардаах тимир муостаны норуот депутата Виктор Лебедев бэйэтин баҕа санаатын күүһүнэн туттаран бар дьонугар үйэлээх бэлэҕи уунна.
Харбалаахтааҕы «Төлөн» чох разреһын генеральнай дириэктэрэ Прокопий Рахлеев, муоста аттыгар сынньанар муннук оҥотторон силигин ситэрэн-хоторон биэрдэ. Манна хас даҕаны сынньанар ыскамыайкалар уонна хачыаллар туруоруллубуттар.
Онон Ойуунускай бэлиэ сылыгар түмэл-уһаайбаҕа саҥа тутуулар олоххо киирдилэр. Бу барыта саҥа көлүөнэ дьоно-сэргэтэ Былатыан Ойуунускай сырдык аатыгар сүгүрүйүүтэ, махтаныыта буолар. Кини төрөөбүт алааһыгар үс саха баарын тухары дьон-сэргэ суола тыргылла туруохтун!
Светлана Халгаева, Чөркөөх