Саха дьоно уутуйан үэскээбит ураты сирэ хаһыат сирийэригэр арылхайдык көстөр. Хаһыат рубрикалара, баай матырыйаала, ырытар, анаарар сатабыла итини дьоһуннук мэктиэлиир. Бу хаһыакка дойдуларыгар, үлэлэригэр бэриниилээх дьон үлэлиирин сэрэйиэххэ сөп.
Улуус түбүктээх үлэтин-хамнаһын, олоҕун-дьаһаҕын сырдатыыттан нэһилиэнньэ өйө-санаата, таһыма тутулуктаах. Бу күннэргэ буолан ааспыт дойдубут Аҕа баһылыгын быыбарыгар Таатта улууһа биир бастыҥ көрдөрүүлээх буолуутугар, мин саныахпар, олохтоох бэчээт оруола улахан.
Айымньылаах кэлэктиип күннээҕи түбүгэр, ситиһиитигэр эрэдээктэр Анна Константиновна Посельская сүрүн тирэх уурсар салайааччы. Кини өр сыл бу эйгэҕэ таһаарыылаахтык үлэлээбит буолан, ааҕааччыны улуус олоҕун, уопсыстыбаны кытары сомоҕолуур, түмэр күүһүн болҕомтоҕо ылбыта харахха быраҕыллар. Кини Саха Сирин суруналыыстарын Сойууһугар биир уопуттаах эрэдээктэр быһыытынан сыаналанар, ытыктанар айар үлэһит.
Биэс сыллааҕыта улууска хаһыат бэлиэ күнүгэр кэлэ сылдьан, олохтоох дьон улуус хаһыатынан киэн туттарын, эрэдэксийэ үгүс саҥа бырайыактары, тэрээһиннэри ыытарын астынан барбытым. Таатта улууһун, кини үлэһит дьонун сырдатыыга анаммыт куоҥкуруска кыттан, хаһыат далааһыннаах үлэтин бэлиэтии көрбүтүм. Бу бүччүм кэлэктиипкэ үлэлээн аспыт дьон Саха Сирин биллэр-көстөр суруналыыстара буолбуттарын билэбин. Онон айар үлэҕэ кынат үүннэрэр кэскиллээх кэлэктиип диэн сыаналыыбын.
Салгыы даҕаны Таатта хаһыата хас биирдии ыалга күүтүүлээх ыалдьыт буоллун. Саҥаны, сонуну кэпсээн, сайдыыга кынаттаатын. Улуус, өрөспүүбүлүкэ, дойду устуоруйатыгар умнуллубат бэлиэ түгэннэри үйэтитэ турдун. Таатта хаһыат улуус сирэйэ буолан кэрэхсэбили, билиниини ыла турарыгар эрэнэбин.
Альбина Тарабукина, СӨ суруналыыстарын Бырабылыанньатын чилиэнэ, СӨ Култууратын үтүөлээх үлэһитэ, улуус олоҕун сырдатыыга 2019 сыллаах куоҥкурус кыайыылааҕа.