Ыам ыйын 28 күнүгэр Таатта улууһун киинигэр оскуолаҕа киириэн иннинээҕи сааастаах оҕолорго улуустааҕы спартакиада күрэһэ буолан ааста. Спартакиаданы алтыс төгүлүн «Чуораанчык» оҕо саада көҕүлээн, иилээн-саҕалаан ыытта.
Сарсыардаттан спорт, физкультура уораҕайыгар – КСК-ҕа аҕыс оҕо саадыттан кырачаан спортсменнар, уһуйааччылар, төрөппүттэр тоҕуоруһа муһуннулар. Ол курдук Игидэй, Дьүлэй, Чычымах, Тыараһа нэһилиэгиттэн, ону тэҥэ Ытык Күөлтэн «Сулусчаан», «Кэнчээри», «Березка», «Чуораанчык» уһуйааннарын аатыттан 45 оҕо ох курдук оҥостон, эрчиллэн кэлэн күөн көрүстүлэр. Күрэхтэһии 3 сүрүн көрүҥүнэн барда: 30 м. сүүрүү, миэстэттэн уһуну ыстаныы, 200 г. ыйааһыннаах мөһөөччүгү быраҕыы. Күрэс сүрүн судьуйатынан үөрэх салалтатын исписэлииһэ Константин Афансьевич Ширяев буолла.
Күүрээннээх күлүмэх күрэхтэһии түмүгүнэн түмүктэр ситиһилиннилэр, оҕолорго мэтээл туттарылынна.
Уолаттарга 30 м. сүүрүүгэ Николаев Дьулус (“Кэнчээри”) — 3 миэстэ (5.45 мүн.), Васильев Артем (Чычымах) – 2 миэстэ (5.44 мүн.), Никифоров Даниил (“Березка”) – 1 миэстэ (5.20 мүн.) буоллулар.
Кыргыттартан 30 м. сүүрүүгэ Петрова Амелия (“Чуораанчык”) — 3 миэстэҕэ (6.00 мүн.), Бурнашева Дайаана (“Сулусчаан”) – 2 миэстэҕэ (5.93 мүн.), Канаева Лилиана (Чычымах) – 1 миэстэҕэ (5.82 мүн.) таҕыстылар.
Миэстэттэн уһуну ыстаныы оҕо былчыҥнарын сайыннарар, күүрүүнү үөскэтэр хамсаныы буолар. Бу күрэххэ үс төгүл ыстаныы түмүгүнэн бастыҥ көрдөрүүнү ситистилэр: Марков Айтал (Дэбдиргэ) – 3 миэстэ (129 см.), Игнатьев Алгыстаан (“Кэнчээри”) – 2 миэстэ (132 см.), Баишев Владислав (“Чуораанчык”) – 1 миэстэ (142 см.).
Кыргыттарга: Борисова Амелия (“Сулусчаан”) – 3 миэстэлээх (123 см.), Бродникова Диана (“Кэнчээри”) — 2 миэстэлээх (127 см.), Эртюкова Айанесса (“Чуораанчык”) -1 миэстэлээх (127 см.) кынаттаах ыстаҥаһыттарынан буоллулар.
Бүтэһик көрүҥүнэн 200 грамм ыйааһыннаах мөһөөччүгү быраҕыыга Хатылаев Эрчим (“Чуораанчык”) — 3 миэстэҕэ (7м.73 см..), Николаев Ярик (“Сулусчаан”) – 2 миэстэҕэ (8м. 71 см.), Новгородов-Неустроев Мирослав (“Игидэй”) – 1 миэстэҕэ (11м.48 см.) таҕыстылар.
Кыргыттарга: Посельская Ньургуйаана (“Кэнчээри”) – 3 миэстэлээх (7 м. 02см.), Беркина Каролина (Чычымах) — 2 миэстэлээх (7 м. 67 см.), Кутугутова Карина (“Сулусчаан”) -1 миэстэлээх (8 м.55 см.) кыайыылаахтарынан буоллулар.
Хамаандалар күрэхтэһиигэ кыттыыларын түмүгүнэн уопсай миэстэни таһаарыы уустуктардаах буолбутун да иһин, судьуйа спорт быраабылатын тутуһан, халбаҥнаабат быһаарыыларынан тыҥааһыннаах быһыыны-майгыны уталыттылар. Ол курдук, 20 баллаах “Чуораанчык” уһуйаан хамаандата 3 миэстэни ылла, 17 баллаах “Сулусчаан” оҕону сайыннарар киин 2 миэстэҕэ таҕыста, 17 баллаах “Кэнчээри” уһуйаан ылбыт миэстэлэрин хаачыстыбатынан кыайыылаах буолла, көһө сылдьар кубогынан наҕараадаланнылар.
Күүстээх, сымса, кыраҕы оҕолорбут сылтан сыл көрдөрүүлэрэ тупсан, ситиһиилэрэ үрдээн иһэллэриттэн үөрэбит, кыра саастарыттан спорт арахсыспат аргыс буолуохтун диэн баҕа санаабытын этэбит.
Ирина Тихонова