Атырдьах ыйын 11-13 күннэригэр Үөһээ Бүлүү нэһилиэгин Түгэхтэй алааһыгар Исиидэр Бараахап төрөөбүтэ 125 сыллаах үбүлүөйдээх тэрээһиннэрин чэрчитинэн “АКТИВВЕРВИЛ” ыччат бэстибээлигэр Таатта улууһуттан 9 ыччат кыттыыны ылан кэллэ.
Таатта улууһун ыччат уонна дьиэ кэргэн салаатын начальнига Иван Иванов бу курдук кэпсээтэ: Бэстибээл кыттыылаахтарынан өрөспүүбүлүкэни төрүттэспит, улуу убайдарбыт – Платон Ойуунускай, Максим Аммосов, Исидор Барахов, Степан Аржаков, Степан Васильев — төрөөбүт улуустарыттан ыччаттар муһуннубут. Үс күн устата бэстибээлгэ кэлбит ыччаттар Саха сирин сайдыытын, инникитин, саҥаны киллэриигэ толкуйдаан, бырайыак көмүскээтибит. Саамай интириэһинэйэ хамаандаларбыт улуустарынан буккуһан буолла. Кэрэхсэбилэ диэн бары арахсан тус-туһунан хамаандаҕа киирэн атын улуус ыччаттарын кытта ыкса билсэн, доҕордоһон кэллибит. Бэстибээл чэрчитинэн бырайыак суруйуутугар анал үөрэҕи аастыбыт, маастар кылаастар, спортивнай күрэхтэһиилэр, киинэ көрүүтэ былаан быһыытынан ыытылынна, ону сэргэ бэстибээл аһыллыытыгар СӨ Ил Дархана Айсен Николаев кэлэн эҕэрдэлээтэ, бэстибээл кыттыылаахтарыгар ситиһиини баҕарда.
Бырайыак көмүскээһинигэр 10-ча хамаанда күөн көрүстэ, кинилэр «Политика» «Экономика», «Предпринимательство», «Патриотика», «Лидерство» тиэмэлээх былаһааккаларга үлэлээтилэр. Үһүс күммүтүгэр бырайыактары көмүскээһин буолла, манна 16 киһилээх «Күн ыччаттара» хамаанда кыайыылааҕынан таҕыста. Хамаанда Кытай Хэйхэ куоратыгар сынньанарга сертификатынан наҕараадаланна. Бу хамаандаҕа биһиги улуустан Георгий Федосеев, «Тааттаавтодор» АО тэрилтэ юриһа, кыттан, сертификакка тигистэ.
Мин кыттыбыт хамаандам аата «Вервишинки” иккис миэстэ буолан «Өлүөнэ очуостара» айылҕа пааркатыгар сынньанарга путевканан наҕараадаланныбыт. Үһүс миэстэни ылбыт хамаандаҕа биһиги улуустан кыттыбыт урбаанньыт Виктория Васильева, тиксэн, СӨ Баһылыгын үрдүкү оскуолатыгар (ВШИМ при Главе РС(Я)) үөрэнэргэ сертификат тутта.
Ураты тэрээһиҥҥэ сылдьан элбэххэ үөрэннибит, атын улуус ыччаттарын кытары сомоҕолоһон, улууспутугар туһалаах буолуо этибит диэн баҕа санаалаах кэллибит».
Елена Слепцова.