Таатта улууһун аартыгар (границатыгар) бастакы субуотунньук тэрилиннэ. Улуустааҕы норуот айымньытын дьиэтин (Вырдылин Г.Г.), Тыараһа нэһилиэгин (Турнин П.П.) эр дьоно тутуу барыахтаах объектар оннуларын хаарын ыраастаатылар. «Тааттаавтодор» АО (Бочонин И.И.) уонна «Дорстрой» (Бурмистров И.И.) көмөлөрүнэн кумах кэллэ.
Олоҥхоһут пааматынньыга өрөмүөннэниэхтээх, ураһа конструкцията тутуллуохтаах, арчыланарга аналлаах тутуу оҥоһуллуохтаах. Ураһа конструкцията 14 дулҕалаах буолуоҕа, хас биирдиитигэр нэһилиэк аата суруллуоҕа, qr код сыһыарыллыаҕа (ол нөҥүө нэһилиэк историятын көрүөхтэрэ). Ортотугар оллоон оҥоһуллуоҕа, иһэ барыта тротуарнай плиткаланыаҕа. Олоҥхоһукка, ураһаҕа, арчыланар сиргэ ыллыктара тротуарданыаҕа. Күрүөтэ модьу-таҕа гына оҥоһуллуоҕа. Таатта үрэххэ киирэр кирилиэс саҥардыллыаҕа. Бу тутууну Ил Түмэҥҥэ бар дьон депутаата, «Саханефтегазсбыт» АО генеральнай дириэктэрэ Виктор Николаевич Лебедев үбүлүөҕэ.
Тимир Аал Луук Мас, балаҕан, ыһыах иһитин-хомуоһун набора, Таатта гиэрбэтэ Тыараһа нэһилиэгин ыһыахтыыр сиригэр субуотунньугунан көһүөхтэрэ.
Арыы тыа кэрдиллиэҕэ, барыта тэҥнэнэн баран 12*6 м.стела тутуллуоҕа. Кинетический фасад диэн аныгы технологиянан оҥоһуллуоҕа. Стела үөһээ өттүгэр Таатта, биир өттүгэр Чурапчы диэн суруллуоҕа. Ис хоһооно — аартыкка турар Боотур куйаҕын бэлиэтэ буолуоҕа. Таатта урбаанньыттара, Чурапчы салалтата (баһылык С.А.Саргыдаев) үбүлүөхтэрэ. «Вилюй» упрдор ФКУ (Н.И. Андреев) былаанынан кыраныысса туһаайыытынан барыта асфаалланыаҕа, федеральнай трасса ирдэбилигэр сөп түбэһэр тохтобул сир оҥоһуллуоҕа.
Тутааччылар, биир дойдулаахтарбыт, Ю.А.Дарбасов (Ректайм), В.В.Яроев (Уран Саха), С.И.Софронов (Сириус). Былаан быһыытынан от ыйын 1 күнүгэр саҥардыллыбыт Таатта аартыга аһыллыахтаах.
Күндү Таатта улууһун олохтоохторо, мантан ыла аартыкка элбэх субуотунньуктар буолуохтара. Бары таптыыр Тааттабыт аартыгын оҥоһуу үлэтигэр харыбытын ньыппарынан баран тоҕо түһүөххэйиҥ диэн ыҥырабыт.
«Манчаары Оонньуутун»
дирекциятын пресс-киинэ.