Тааттаҕа өрөспүүбүлүкэтээҕи «Дьулуур» ХIV Спартакиада кыайыылаахтара чиэстэннилэр

Саха сиригэр физкультура уонна спорт хамсааһына тэриллибитэ 100 сылыгар аналлаах Амма улууһугар ыытыллыбыт адаптивнай спорт көрүҥнэригэр өрөспүүбүлүкэтээҕи «Дьулуур» ХIV спартакиада кыайыылаахтарын чиэстиир үөрүүлээх тэрээһин улуус дьаһалтатыгар ыытылынна.

Күүстээх санаалаах киэн тутта ааттыыр биир дойдулаахтарбыт спорт бары көрүҥнэрин баһылаан, спорт сомоҕолуур күүһүнэн кынаттанан, кыайыыга дьулуурдарынан ситиһиилээхтик кыттан кэллилэр.

Тэрээһиҥҥэ улуус баһылыгын солбуйааччы Егор Ноенохов, улуустааҕы спорт кэмитиэт салайааччыта Ньургун Сабарайкин, норуот айымньытын дьиэтин дириэктэрэ Гаврил Вырдылин, Тааттыныскай нэһилиэк баһылыга Егор Павлов, Дьохсоҕон нэһилиэгин баһылыга Петр Захаров, тыа сирин түөлбэлэрин баһылыктара эҕэрдэ истиҥин, баҕа санаа бастыҥын анаан туран, сыаналаах сэртипикээттэри туттардылар.

Тааттыныскай нэһилиэк баһылыга Егор Павлов күүстээх санаалаах, инникигэ дьулуурдаах спартакиада кыайыылаахтарыгар истиҥ эҕэрдэтин тиэрдэн туран, инникитин даҕаны түмсүү күүһүнэн спорт бары сатабылларын баһылаан, инники күөҥҥэ сылдьарга баҕарда.

Норуот айымньытын дьиэтин дириэктэрэ Гаврил Вырдылин адаптивнай спорт сайдыытыгар Таатта улууһа күүскэ үлэлэһэрин билиһиннэрэн туран, спартакиада кыайыылаахтарыгар: «Үрдүккэ дьулуһарга, үтүө көрдөрүүлэри ситиһэргэ!» — баҕарда. Үөрүүлээх быһыыга-майгыга Саха сириттэн Арассыыйа сборнай хамаандатыгар икки спортсмен баарыттан биирдэстэрэ Таатта улууһуттан Яков Николаевич Максимов буоларын сырдатан туран, кэллэктиип аатыттан анал сэмэй бэлэҕи эдьиийэ Марина Максимоваҕа туттарда.

Улуустааҕы үлэ уонна социальнай управление начальнига Михаил Тарасов кэнники кэмҥэ адаптивнай спорт көрүҥэр СӨ Ил Дархана Айсен Николаев быһаччы өйөбүлүнэн улахан болҕомто ууруллан, күүстээх үлэ барарын иһитиннэрэн туран, өрөспүүбүлүкэтээҕи «Дьулуур» ХIV спартакиадаҕа улуус чиэһин көмүскээбит күрэхтэһээччилэргэ истиҥ эҕэрдэтин тиэртэ.

Дьохсоҕон нэһилиэгин баһылыга Петр Захаров адаптивнай спорт көрүҥнэригэр ыытыллыбыт спартакиада үрдүк историческай суолталааҕын чопчулаан туран, күрэс кыайыылаахтара күүстээх санааларынан, олоххо тардыһыыларынан үтүө холобур буолалларын бэлиэтээтэ.

Чиэстээһин үөрүүлээх чааһыгар улуустааҕы доруобуйаларынан хааччахтаахтар уопсастыбаларын салайааччыта Надежда Белолюбская улуус дьаһалтатыгар, спорт кэмитиэт салайааччыта Ньургун Сабарайкиҥҥа хас биирдии спорт көрүҥэр тренердэри анаан үлэлэспитигэр барҕа махталын биллэрдэ.