Сегодня в будущее получаешь,
В медицинское сообщество билет,
Тебе лишь с гордостью желаем
Нести вперед свой факел, в свет!
Антонина Андросова.
Сырдыкка-кэрэҕэ уһуйар бэлиэ күн Ытык Күөлгэ В.А. Вонгродскай аатынан Дьокуускайдааҕы мэдиссиинэ кэллиэһин филиала бастакы хараҥаччыларыгар аанын тэлэччи аһан, Билии бырааһынньыгын үөрүүтүн икки бүк үрдэттэ.
Орто анал үөрэх салаата мэдиссиинэ кэллиэһэ, «Таатта улууһа» МО дьаһалтата уонна Тааттатааҕы поликлиника салалтата ыкса ситимнээхтик үлэлэһэн, үс өрүттээх дуогабар түһэрсибитин үтүө түмүгэр аһылынна.
Таатта улууһугар кэллиэс филиалын салайааччытынан уонна кураторынан Светлана Тимофеевна Христофорова ананна. Быйыл уопсайа 55 абитуриент орто үөрэххэ туттарыста. Саҥа үөрэх дьылыгар 40 устудьуон биэссэр уонна мэдиссиинэ сиэстэрэтин идэтин баһылыырга икки бөлөххө арахсан үөрэниэхтэрэ. Анал кууруһу ааспыт А.И. Софронов – Алампа аатынан Ытык Күөл 1 нүөмэрдээх орто оскуолатын учууталлара устудьуоннары тустаах биридимиэттэргэ үөрэтэн билиилэрин хаҥатыахтара. Үрдүк квалификациялаах Тааттатааҕы балыыһа быраастара бастыҥ сатабылларга уһуйуохтара, баай үөрүйэхтэрин иҥэриэхтэрэ.
Устудьуоннар ортолоругар Мэҥэ Хаҥалас, Бүлүү, Таатта улуустарын быйылгы выпускниктара, элбэх оҕолоох ыал ийэлэрэ, анал байыаннай дьайыыга сылдьар эр хоһууттарбыт дьиэ кэргэттэрэ, атын эйгэҕэ үлэлээбит испэсэлиистэр бааллар.
Үөрүүлээх түгэҥҥэ Тааттатааҕы балыыһа кылаабынай бырааһа Сардана Кононова устудьуоннар үөрэххэ эппиэтинэстээхтик сыһыаннаһан, күүстэрин, кыахтарын ууран туран үөрэниэхтэрэ диэн эрэнэрин биллэрдэ.
Устуоруйаҕа киирэр бэлиэ күнү мэдиссиинэ кэллиэһин устудьуона Анна Аржакова «Дьоллоох түгэн» сүргэни көтөҕөр, санааны кынаттыыр ылбаҕай ырыатынан киэргэттэ.
Аны икки-үс сылынан кэскиллээх уонна ситимнээх үлэ үтүө түмүгэр мэдиссиинэ эйгэтэ каадырынан толору хааччыллан, эмчит үрдүк аатын сүкпүт үлэһиттэри таһааран, бастакы хараҥаччыларын көтүтүөҕэ.
Мария Павлова.
Видеоматериалы бэлэмнээтэ Михаил Копырин.