Балаҕан ыйын 25-26 күннэригэр А.Е. Мординов аатынан Тааттатааҕы лиссиэй үөрэнээччилэрэ Хаҥалас улууһун Өктөм нэһилиэгэр, Саха сирин Бастакы Президенэ Михаил Ефимович Николаев төрөөбүт дойдутугар, «Якутия, вперед!» форсайт-сессияҕа көхтөөхтүк кыттан кэллилэр.
Тэрээһин маҥнайгы күнүгэр форсайт-сессия кыттыылаахтара А.Г., Н.К. Чиряевтар ааттарынан Саха национальнай гимназиятыгар Бастакы Президент Михаил Ефимович Николаев соратниктара Евгения Исаевна Михайлованы, Александр Николаевич Ким-Кимэни, Александр Андреевич Кугаевскайы кытары көрсүһүүгэ сылдьан, М.Е. Николаев «Киһи бастаан доруобай, үөрэхтээх буоллаҕына дойдутугар көмөлөөх, туһалаах буолар» диэн санаанан салайтаран үлэлээн ааспытын, бөдөҥ салайааччы Саха сиригэр үөрэх сайдыытыгар үгүс үлэни ыыппытын туһунан элбэҕи билэн кэллилэр.
Көрсүһүүгэ оскуола үөрэнээччилэрэ норуот олоҕор улахан суолталаах экономика, үөрэх, мэдиссиинэ хайысхаларыгар Саха өрөспүүбүлүкэтин сайдар саҕахтарын торумнаан, хамаандаларынан анал бырайыактары көмүскээтилэр, экономика, үп миниистирдэрин солбуйааччыларын, доруобуйа харыстабылын үлэһиттэрин кытары аһаҕас кэпсэтиигэ кытыннылар.
Сырдыгы саҕар, сүргэни көтөҕөр тэрээһинтэн Тааттатааҕы лиссиэй үөрэнээччитэ Аэлита Петрова: «Бу күн биһиги улахан дьон курдук сананан ыллыбыт», — диэн астыммыт санаатын үллэстэр.
Иккис күн Бастакы Президент ситимин оскуолаларын кэлэр кэнчээрилэрэ «Николаев — Киинигэр» умнуллубат экскусияҕа сырыттылар, СӨ Ил Дархана Айсен Сергеевич Николаевы кытта көрүстүлэр. Саха норуотун олоҕор сүҥкэн кылааты киллэрбит Михаил Ефимович Николаев сырдык аатын үйэтитэр туһуттан СӨ Ил Дархана Айсен Николаев Судаарыстыбаннас бэлиэ күнүгэр сыл ахсын маннык көрсүһүүлэр ыытыллан, үтүө үгэскэ кубулуйуохтара диэн бигэ санаатын биллэрдэ.
Тааттатааҕы лиссиэй үөрэнээччилэрэ Михаил Ефимович Николаев төрөөбүт норуотун сайдыытыгар анаабыт олоҕун, кини ыллыктаах санааларын үтүө холобура оҥостуохтара. Кэнчээри ыччаты үтүөҕэ үөрэтэр, үрдүккэ уһуйар көрсүһүүлэр үксүү турдунар!