Сэтинньи 28 күнүгэр Таатта улууһун Иван Николаевич Гуляев аатынан Туора Күөл орто оскуолатыгар улуустааҕы «Тарбаахаптыы астыахха» күрэх дьоро күнэ буолан ааста.
Күрэххэ барыта 8 уол кытынна. Дьууллуур сүбэҕэ үлэлээтилэр: Таатта улууһун үөрэҕириитин салаатын начальнигын солбуйааччы Мира Николаевна Луковцева, саха төрүт аһын киэҥ эйгэҕэ тарҕатааччы, РФ, СР эргиэнин бэтэрээнэ Бондарева Мария Егоровна, Дьүлэй нэһилиэгин бастыҥ хаһаайката, 5 разрядтаах асчыт идэлээх Варвара Романовна Шестакова. Асчыттар 3 түһүмэхтэн турар уустук көрүҥнэри аастылар. Ол курдук, астаах саламаат, убаһа этиттэн бүлүүдэ (2 гарнирдаах, соустаах) уонна минньигэс десерт. Кыттааччылар араас гарнирдары, сонун соустары оҥорон, бүлүүдэлэрин сиэдэрэйдик киэргэтэн сөхтөрдүлэр. Уолаттар бары тутталлара-хапталлара түргэнэ, бэрт уустук бүлүүдэлэри ыйыллыбыт бириэмэҕэ сатабыллаахтык астаан, дьүүллүүр сүбэҕэ көмүскээтилэр.
Бары бэрт эрэллээхтик туттан-хаптан, ас астыыр үөрэхтээхтэрэ көстөр.
Түөрт чаас устата тохтобула суох бүлүүдэ эриэккэһин астаан, дьүүллүүр сүбэҕэ көмүскээтилэр.
Дьүүллүүр сүбэ түмүк таһаарарын бары да олус долгуйа күүттүбүт. Кылаан чыпчаал үрдүк аатын ылла Таатта улууһун А.Е.Кулаковскай аатынан Дьохсоҕон орто оскуолатын 11 кылааһын үөрэнээччитэ Попов Максим (сал. Попова Елена Егоровна, Габышев Семен Лукич).
1 үрдэл — А.Е. Мординов аатынан Тааттатааҕы лицей 9 кылааһын үөрэнээччитэ Варламов Коля (Сал. Иванова Мария Ивановна).
2 үрдэл – Алампа аатынан Ытык Күөл 1 нүөмэрдээх ОО 9 (физмат) кылааһын үөрэнээччитэ Коркин Борис (Сал. Поисеева Надежда Архиповна).
3 үрдэл — И.Н. Гуляев аатынан Туора Күөл орто оскуолатын 10 кылааһын үөрэнээччитэ Васильев Артём. (Сал.У.И. Гуляева, В.Д. Павлова) «Уран тарбахтаах асчыт» анал аат — Тыараһа анал коррекционнай оскуола 10 кылааһын үөрэнээччитэ Попов Эркин, «Саха сандалытын маастара» анал аат — Алампа аатынан Ытык Күөл орто оскуолатын 1 нүөмэрдээх ОО 9 (физмат) кылаас үөрэнээччитэ Сунхалыров Айтал (Сал. Поисеева Надежда Архиповна), «И.М. Хатылаев аатынан Баайаҕа орто оскуолатын 8 кылааһын үөрэнээччитэ Неустроев Дьулусхан (Сал. Макарова Парасковья Васильевна), «Кэскиллээх асчыт» анал аат — Тыараһа анал коррекционнай оскуола 10 кылааһын үөрэнээччитэ Толстяков Айысхан (Сал. Егорова Татьяна Петровна). Кыайыылаах уолаттарга тэрийээччилэр анал кубок туттардылар, бириистэринэн наҕараадалаатылар. Үс бастакы миэстэни ылбыт уолаттар ахсынньы 5-6 күннэригэр республикатааҕы «Тарбаахаптыы астыахха» күрэххэ Дьокуускай куоракка Таатта улууһун чиэһин көмүскүөхтэрэ.
Күрэххэ кыттыбыт оҕолор бары «өттүк харалаах, илии тутуурдаах» үөрэн-көтөн тарҕастылар. «Тарбаахаптыы астыахха» күрэх кэнчээри ыччакка үтүө холобур буолан, үүнэ-сайда турдуҥ, өбүгэбит аһын билэр, астыыр, күннээҕи олоххо туһанар, киэҥ эйгэҕэ таһаарар дьон элбии турдуннар.
Таатта улууһун Иван Николаевич Гуляев аатынан Туора Күөл орто оскуолатын коллектива.