Бэҕэһээ Аан дойду дьахталларын күнүн көрсө үгэс буолбут улуустааҕы «Кыталык Куо» уонна «Үрүҥ Уолан» күөн күрэс буолан ааста.
Онно биһиги үөрэхтээһиммит холбоһугуттан Мичил Спиридонов, лицей студеннара Марина Дохунаева, Саша Оконешников баран, ситиһиилээхтик кыттан кэллилэр. Уолаттар сарсыарда өттүгэр тардыныыга, ох саанан ытыыга, ыстаҥаҕа күрэхтэстилэр. Саша ох саанан ытыыга маҥнайгы миэстэни ылла. Оттон кыргыттар Таатта имигэс талаҕынан кур өрөргө, онно анаан хоһоон айарга күрэхтэспиттэрэ. Күнүс 5 чаастан П.А.Ойуунускай аатынан театрга бэйэни билиһиннэрии, талааны көрүү, үҥкүүгэ күрэс үрдүк таһымҥа ааста. Интеллектуальнай түһүмэххэ «Манчаары оонньууларын» историятыттан уонна «Төрөөбүт дойдугун төһө билэҕин?» диэн боппуруостарга эппиэттээтилэр.
Ахсыс кылаас үөрэнээччитэ Мичил Спиридонов кыттааччылартан сааһынан төһө да саамай кыралара буоллар, иҥнэн-толлон турбакка, олус бэркэ кыттан, «Мистер Позитив» анал аатынан бэлиэтэннэ. Оттон Мариналаах Саша бэйэлэригэр эрэллээхтик, тахсыылаахтык кыттан, көрөөччүлэргэ үгүс үөрүүнү бэлэхтээтилэр. Түмүгэр, Марина -«Мисс Дружба», Саша — «Мистер Бэргэн» анал ааты ылары ситистилэр. Үөрэнээччилэр маннык күрэхтэргэ кыттан сайдаллар, бэйэлэрин ис кыахтарыгар эрэллэрэ үрдүүр. Бу оҕолору бэлэмнээбит учууталларга, преподавателлэргэ махталбытын тиэрдэбит.
Валентина Кривошапкина, Харбалаах.