Сэтинньи 29 күнүгэр С.П.Алексеев Боһуут аатынан Чаппанда орто оскуолатыгар сылын аайы ыытыллар алын сүһүөх үөрэнээччилэригэр “Уоланнар ааҕыылара” буолан ааста. Күрэхпит быйыл Саха бастакы народнай поэта, “Октябрьскай революция”, ”Үлэ Кыһыл Знамята”, “Бочуот Знага” орденнар кавалердара Серафим Романович Кулачиков – Эллэй 120 сылыгар ананна. Манна 4 куустаттан кыайыылаахтара, бастыҥнара, 11 уолан кыттыыны ылла. Күрэҕи алын сүһүөх учуутала Семен Борисович Николаев иилээн-саҕалаан ыытта. Күрэх дьүүллүүр сүбэтигэр киирдилэр: 1.Оройуоннааҕы алын сүһүөх кылаас учууталларын методическай холбоһугун салайааччыта Туяра Сергеевна Апросимова 2.Чаппанда орто оскуолатын саха тылын учуутала Екатерина Ивановна Ефимова 3.Чаппанда тыа сирин аҕалар түмсүүлэриттэн Александр Николаевич Сидоров 4. Орто оскуола директора Юрий Валерьевич Алексеев 5. Орто оскуола директоры хаһаайыстыбаннай чааһын солбуйааччыта Михаил Гаврильевич Данилов.
Күрэхпит түмүгүнэн кылаан кыайыы үрдүк ааты ылла 3№ Ньурба алын сүһүөх оскуолатыттан Михайлов Айсиэн;
1 миэстэ Гаврильев Ваня Сүлэ оскуолата;
2 миэстэ Слепцов Ньургун 3№ Ньурба алын сүһүөх оскуолата;
3 миэстэ Тоноев Айыллаан Ньурба элбэх хайысхалаах гимназиятыттан;
Кылаан кыайыы добун суругун Серафим Романович Кулачиков аатынан Таатта улууһун Чычымах орто оскуолатын коллективын аатыттан туттарылынна. Кыттааччылар хоһоон түһүлгэтигэр кыттыыны ылбыттарын туоһулуур анал сертификаттары туттулар. Кыайыылаахтар добун суруктарынан уонна сэмэй бэлэхтэринэн наҕараадаланнылар. Спонсордарынан буоллулар: М.С.Семенов аатын сүгэр “Дьоҕур” культура киинэ, Чаппандатааҕы балыыһа уонна оскуолабыт коллективтара.
Павлова С.А. Чаппанда орто оскуолатын алын сүһүөх холбоһугун салайааччыта.