Муус устар 3-4 күннэригэр Ытык Күөлгэ үгэскэ кубулуйбут үөрэх үлэһиттэрин спартакиадатын бастакы түһүмэҕэ ыытылынна. Быйылгы спартакиада 7 көрүҥҥэ: волейболга, саахымакка, дуобакка, остуол тенниһигэр, буулдьалаах саанан ытыыга, хабылыкка, хаамыскаҕа, дартска ыытылынна.
Спартакиада сүрүн сыала – чөл олоҕу пропагандалааһын, маассабай спорду сайыннарыы, үлэ кэллэктииптэрэ спортка, үлэҕэ түмсүүлэрин көҕүлээһин буолар.
Спартакиада бастакы этабыгар улуус 24 үөрэҕин тэрилтэлэриттэн сүүмэрдэнэн, 15 хамаанда, 179 кыттааччы волейболга, остуол тенниһигэр, саахымакка илин-кэлин түһүстүлэр.
Спартакиада үөрүүлээх аһыллыытыгар улууспут үөрэх салалтатын начальнига И.И. Дягилев, үөрэх үлэһиттэрин идэлээх сойууһун бэрэссэдээтэлэ П.В. Борисов, күрэхтэһии сүрүн судьуйата А.А. Неустроев сүүмэрдэммит хамаандалар чилиэннэрин эҕэрдэлээтилэр, кыайыыга дьулууру, үрдүк көрдөрүүнү, тэрилтэлэргэ спорду сайыннарарга баҕа санааларын эттилэр. Ол кэннэ А.Е. Мординов аатынан Таатта лицейин үөрэнээччилэрин «Төрүт дорҕоон» ансаамбыла барабаан тыаһынан күрэхтэһиибит ньиргиэрдээхтик саҕаланна.
Саха таптыыр оонньуутугар дьону түмэр, ыһыылаах-хаһыылаах волейбол көрүҥэр Эдуард Чемезов хапытааннаах, Николай Винокуров, Кэрэчээнэ Терентьева, Татьяна Слепцова курдук күүстээх оонньооччулардаах Харбалаах үөрэх холбоһуга быйыл эмиэ кубок хаһаайыннарынан буоллулар. Иккис миэстэҕэ Тааттатааҕы оҕо спортивнай оскуолатын, үөрэх салалтатын хамаандалара тахсан, былырыыҥҥы көрдөрүүнү тупсарда. Үһүс бириистээх миэстэни мэлдьи үчүгэй оонньууну көрдөрөр Тыараһа уонна Даайа Амма хамаандалара былдьастылар. Бу сырыыга Даайа Амма хамаандата күүрээннээх киирсиигэ инники тахсан 3-с миэстэҕэ тигистэ.
Саахымакка эр дьоҥҥо оҕо спортивнай оскуолатыттан Александр Попов, Чөркөөхтөн Дмитрий Максимов, Тыараһа коррекционнай оскуолатыттан Нестер Егасов кыайыылаахтарынан буоллулар. Кэрэ аҥардарга лицейтэн Людмила Сысолятина, 2-с нүөмэрдээх оскуолаттан Ольга Чьямова, Чымнаайыттан Ольга Тистяхова бастыҥ оонньууну көрдөрдүлэр.
Хамаанданан түмүккэ бастакы миэстэҕэ оҕо спортивнай оскуолата лицей хамаандатыттан очко аҥарынан сабырыйан, чорбойон таҕыста. Үһүс бириистээх миэстэҕэ «Күн туллуктара» уһуйаан сэбиэдиссэйэ Иннокентий Татаринов, Ытык Күөл 2-с нүөмэрдээх оскуолатыттан күүстээх саахыматчыт Ольга Чьямова састааптаах хамаанда таҕыста.
Остуол тенниһигэр оҕо спортивнай оскуолата кимиэхэ да дьиэк биэрбэккэ бастакы миэстэни ылыан ылла. Чымнаайы, Чычымах оскуолалара 2-3-с буоллулар. Биирдиилээн оонньууга, ракеткаларынан Леонард Рахлеев, Константин Ширяев, Валентина Антипина бастакы миэстэни ыллылар. Иккис миэстэҕэ Тыараһаттан Назар Петрович Турнин, «Чуораанчык» уһуйаантан Николай Николаевич Никифоров Чычымахтан Анна Канаева таҕыстылар. 3-с миэстэ Чымнаайыттан Федосий Сенькин, Уус Тааттаттан Руслан Николаевич Протодьяконов, Тыараһаттан Гея Сабарайкина буоллулар.
Кэнники кэмҥэ сытыы хараҕы, чопчу хамсаныыны эрэйэр дартс көрүҥэ тэтимнээхтик сайдан эрэр. Бу оонньууну ким баҕарар оонньуон сөп, үлэ быыһыгар, сынньалаҥҥа да, үгүс тэрээһини эрэйбэт спорт көрүҥэр дьон сөбүлээн оонньуур. Манна Чөркөөхтөн Егор Решетников, лицейтэн Анна Турантаева тэҥнээхтэрин булбатылар. Эр дьоҥҥо «Чуораанчык» уһуйаан үлэһитэ Михаил Павлов, оҕо спортивнай оскуолатыттан Прокопий Афанасьев, кэрэ аҥардарга Чөркөөхтөн Надежда Попова, Чычымахтан Лиана Табунанова иккис-үһүс миэстэ буоллулар.
Ытыктабыллаах үөрэх эйгэтин ветераннара Назар Петрович Турнин, Николай Николаевич Никифоров, Иван Иванович Попов, Руслан Николаевич Протодьяконов, Иван Иванович Потапов билигин да ыччаты кытта тэҥҥэ күрэхтэһэн, эдэрдэргэ үтүө холобур буола сылдьаллара хайҕаллаах суол.
Тэрилтэ салайааччылара, Степан Петрович Старостин, Алексей Валентинович Аржаков, Егор Валерьевич Лебедев, Дмитрий Вячеславович Сергеев, Иннокентий Николаевич Татаринов Алгыстаан Михайлович Толстяков бэйэлэринэн кэлэн кыттан, хамаандаларын сүрүннээн, спорду өрө туталларыттан киһи астынар.
Онон бастакы түһүмэх түмүгүнэн Тааттатааҕы оҕо спортивнай оскуолатын, үөрэх салалтатын, «Сатабыл» оҕону сайыннарар киин сүүмэрдэммит хамаандата инники күөҥҥэ сылдьар. Таатта лицейин, «Чуораанчык» оҕону сайыннарар киин, «Туйаара» уһуйаан холбоспут хамаандата 2-с, Чөркөөх оскуолатын «Аленушка» уһуйаан хамаандата 3-с иһэллэр. Кинилэри тилэх баттаһа Тыараһа оскуолатын уонна Коррекционнай интернат-оскуола сүүмэрдэммит хамаандата, Чымнаайы оскуолата, Ытык Күөл 2-с нүөмэрдээх оскуолата, «Күн Туллуктара», «Кэнчээри» уһуйааннар хамаандалара иһэллэр. Ол гынан баран, спортка араас буолар, сыл түмүгэр 3 көрүҥҥэ сөптөөх толкуйу тобулан, дьүккүөрдээхтик дьарыктанан атын хамаандалар күөрэс гынан тахсыахтарын эмиэ сөп.
Түгэнинэн туһанан, оҕо спортивнай оскуолатын коллективыгар (салайааччы Е.Е. Ноенохов, профком председателэ В.Н. Антипина), «Сарыал» киин директорыгар А.И. Тарасовка, «Сулусчаан» уһуйаан коллективыгар (салайааччы Е.Т. Алексеева, профком председателэ А.Ф. Романова), Таатта лицейин коллективыгар (салайааччы И.А. Сивцева, профком председателэ Н.И. Макаров) спартакиада тэриллэригэр көмөлөрүн иһин Таатта улууһун үөрэх үлэһиттэрин идэлээх сойууһун аатыттан махталбытын тиэрдэбит.
Прокопий Борисов,
Таатта улууһун үөрэх үлэһиттэрин идэлээх сойууһун бэрэссэдээтэлэ.