Хатыҥнардаах чараҥнардаах, тоҕус томтордоох Чурапчы улууһун аатырбыт Маҕаайы алааһыгар үһүс төгүлүн XIX өрөспүүбүлүкэтээҕи «Тыа сирин оскуолата & образовательнай маарка» педагогическай дьаарбаҥка үрдүк таһымнаахтык ыытылынна.
СӨ үөрэҕин министиэристибэтин пресс-сулууспата хаартыскаҕа түһэриитэ.
Өрөспүүбүлүкэ араас муннугуттан 3000 кэриҥэ үөрэх эйгэтин үлэһитэ 25 улуустан тоҕуоруһа түмсэн, аныгы сайдыылаах үөрэх ирдэбилигэр толору эппиэттиир 700 саҥа бырайыактары көмүскээн, баай үөрүйэхтэри тарҕаттылар. Сыллата ыытыллар педагогическай дьаарбаҥка кыттааччылар үөрүүлээх парааттарыттан саҕаланна. Үс күннээх дьаарбаҥакаҕа үөрэх эйгэтин уларыйыыларын сырдатар сэминээрдэр, учуутал идэлэрин үрдэтэр куурустар, араас таһымнаах күрэстэр ыытылыннылар.
Дойдуга уонна Саха сиригэр биллэриллибит Үлэ, Педагог уонна Уһуйааччы сылын чэрчитинэн «Бастыҥ Уһуйааччы — Учуутал» үөрэтэр-иитэр үлэ айымньылаах үөрүйэҕин арыйар сонун күрэс буолан ааста. Сыл ахсын учууталлар саҥа санааны саҕар, сонун сүүрээни киллэрэр, оҕону сайыннарар кэрэхсэбиллээх бырайыактара үксээн, үөрэтэр-иитэр эйгэҕэ уопсастыбаннай тэрилтэлэри хабан, үлэ эйгэтин кэҥэтэллэрэ үөрдэр.
Улахан болҕомтону Нам улууһун Хатыҥ Арыы орто оскуолатын уонна Чурапчы улууһун «Кэскил» уһуйаанын «Мохсоҕол» байыаннай-спортивнай былаһааккатын бырайыактара «Чурапчы улууһа» МО баһылыгын 100 тыһ. солк. гранын ылар чиэскэ тигистилэр.
Таатта улууһуттан уһуйааччы түһүлгэтигэр ыытыллыбыт икки күннээх «Бастыҥ педагог-уһуйааччы» күрэс муҥутуур кыайыылааҕынан Варвара Тимофеевна Федорова (А.И. Софронов — Алампа аатынан Ытык Күөл №1 ОО), Эмма Пантелеймоновна Апросимова (А.Е. Мординов аатынан Тааттатааҕы лиссиэй) III-с истиэпэннээх дипломунан наҕараадаланнылар.
Таатта улууһун үөрэҕириитин управлениета уһуйааччыларга аналлаах цифровой галереяҕа бастыҥ быраактыканы көрдөрөн, анал диплому ылла.
Улуус киэн тутта ааттыыр, холобур оҥостор уһуйааччылара Софья Пахомова (Э.К. Пекарскай аатынан Игидэй ОО), Александра Анисимова (Х.И. Кашкин аатынан Даайа Амма ОО) өрөспүүбүлүкэ таһымнаах эксперт сэртипикээтин уонна Уһуйааччы уонна Педагог сылынан саҥа бэчээттэнэн тахсыбыт «Педагог-наставник МР «Таттинский улус» кинигэни бэлэх туттулар.
Тааттатааҕы лиссиэй педагогтара Саргылана Миронова, Альберт Посельскай, Яна Попова, Ольга Корякина «Туйгун -– үөрэнээччи ситиһиитин каартата» цифровой ресурсунан «Норуот быыбара» уопсастыбаннай анал аат дипломанын үрдүк аатын сүгэн, Уус Алдан үөрэҕириитин управлениетын начальнигын 13 тыһ. солк. анал гранын ыллылар.
Бастыҥ үөрүйэхтээх учууталлар Е.И. Будикина, В.Т. Федорова (Ытык Күөл №1 ОО) «Кэлэр үйэ инженердэрэ» бырайыагынан ситиһиилээхтик кыттан, Кэбээйи оройуонун үөрэҕириитин управлениетын начальнигын 12 тыһ. солк. гранын туттулар.
Сыыппара сатабыла түһүмэххэ мультимедийнэй «Айан» бырайыагынан Альберт Посельскай (Тааттатааҕы лиссиэй) 1 м. кыайыылаах аатын ылан дипломунан, 15 тыһ. солк., «Чемодааҥҥа түмэл» күрэскэ «Арассыыйа учууталлара аатыраллар, үөрэнээччилэрин ситиһиилэринэн» анал аакка Фекла Тимофеева (И.М. Хатылаев аатынан Баайаҕа ОО) 1 м. ылан, 5 тыһ. солк., оҕону иитии-үөрэтии эйгэтигэр Теряковтар дьиэ кэргэн ураты үөрүйэхтээх бырайыагы билиһиннэрэн, 5 тыһ. солк. сэртипикээтинэн чиэстэннилэр.
«Сулусчаан» оҕону сайыннарар киин иитээччилэрэ Татьяна Дьяконова, Парасковья Аржакова «Түп этинии – оҕо сайдыытын тирэҕэ» үлэлэринэн сахалыы саҥаны сайыннарыы өрөспүүбүлүкэтээҕи көрүүгэ II истиэпэннээх дипломунан уонна хайҕал суругунан бэлиэтэннилэр. Чөркөөх орто оскуолата «Остуоруйа дойдута» диэн оскуолаҕа киириэн иннинээҕи саастаах оҕолорго аналлаах интеллектуальнай оонньуунан «В мире мудрых мыслей. К.Д. Ушинский» анал ааты сүгэр түһүмэххэ II истиэпэннээх, «Они стояли у истоков автономии Якутской Республики» В.С. Яковлев – Далан аатынан «Воспитание всем миром» анал аат түһүмэххэ дипломунан наҕараадаланнылар.
«Арассыыйа учууталлара аатыраллар, үөрэнээччилэрин ситиһиилэринэн» түһүмэххэ Э.Х. Кашкина, С.П. Монастырева (П.А. Ойуунускай аатынан Чөркөөх ОО) өрөспүүбүлүкэтээҕи «Чемодааҥҥа түмэл» күрэскэ II истиэпэннээх диплому ыллылар.
Игидэй орто оскуолатын педагогтара учууталлар уонна иитээччилэр ортолоругар ыытыллыбыт «Сахалыы саҥаны» сайыннарыы өрөспүүбүлүкэтээҕи күрэс түһүмэҕэр кыттан, хайҕал суругунан бэлиэтэннилэр. Өрөспүүбүлүкэтээҕи педагогическай дьаарбаҥка айымньылаах үлэлээх учууталларын, иитээччилэрин ортотугар бастыҥ быраактыкалары көрдөрдүлэр, аныгы үөрэх ирдэбилигэр эппиэттиир баай үөрүйэхтэри тарҕаттылар.
Инникитин даҕаны, оҕону үөрэтии, иитии хаачыстыбата үрдүү, үлэ дьонун ситиһиилэрэ сиэттиһэ турарыгар баҕарыаҕыҥ!
Автор: Мария Павлова