Бу нэдиэлэҕэ, кулун тутар 13-16 күннэригэр Ытык Күөлгэ гиря анньыытыгар “Манчаары оонньууларыгар” кыттарга Өрөспүүбүлүкэтээҕи сүүмэрдиир күрэхтэһии буолуоҕа. Бу күрэх Саха АССР гиряҕа спордун маастара, Харбалаах бастакы тутааччыта Иустин Иустинович Кулачиков сырдык аатыгар ананыаҕа. Бүгүн Таатта театрыгар күрэхтэһиини үөрүүлээх быһыыга-майгыга аһыы сиэрэ-туома ыытылынна.
Маҥнай дьолуо түһүлгэ тэриллэр алгыһын Иван Федотович Иванов түһэрдэ, кылыһахтаах тойугунан кэлбит спортсменнары айхаллаата, үрдүк ситиһиигэ кынаттаата. Ол кэннэ улуус баһылыгын солбуйааччы С.В. Сунхалыров, гиря спордун федерациятын салайааччыта Г.Г. Вырдылин, улуус депутаттарын сэбиэтин бэрэссэдээтэлэ П.П. Максимов, улуустааҕы дьахтар сэбиэтин бэрэссэдээтэлэ В.И. Будикина, оҕо спортивнай оскуолатын дириэктэрэ Е.Е. Ноенохов, Таатта улууһун спорткомитетын салайааччыта А.П. Сидоров эҕэрдэ тыл эттилэр. Гиря спордун Таатта улууһун федерациятын исполнительнай дириэктэрэ И.И. Бояров улуус дьаһалтатыгар харда махтал тылларын эттэ. Ол кэннэ спортсменнарга анаан, “Тэтим” фирма анал сакааһынан тикпит спортивнай формаларын үөрүүлээх быһыыга туттардылар.
Гиря анньыыта диэн спорт тиэрминин сахатытан “Болгуо анньыыта” диэн тылбаастаабыттарын иһитиннэрдилэр, онон салгыы маннык тыл ситимин иһиттэххитинэ соһуйбаккыт. Күрэххэ кыттар болгуо анньааччыларбытыгар “Манчаарыга” элбэх путевканы ылалларыгар баҕарабыт!
Сарыал Кыыма