Саха Өрөспүүбүлүкэтигэр Ийэ күнүнэн уонна Российскай Федерацияҕа Аҕа күнүнэн эҕэрдэлиибин!
Бу бэлиэ күннэр хас биирдии киһиэхэ дьиэ кэргэн, төрөппүттэр ураты суолталаахтарын санаталлар, төрөппүттэрбит тапталлара, кыһамньылара күндүтүн, биһигини иитиигэ туһаайбыт сыралара үтүө түмүктээҕин көрдөрөллөр.
Күн күбэй ийэ иһирэх таптала өрүү сылааһынан угуттуур, кини мындыра, тулуурдааҕа олоххо дьулуурдаах, дьоҥҥо-сэргэҕэ аламаҕай буоларга үөрэтэр, онтон аҕа хас биирдии дьиэ кэргэҥҥэ, оҕоҕо бигэ тирэх, эрэллээх эркин, дурда-хахха буолар. Кини күүстээх санаата, барыны бары сатыыр, тобулар дьоҕура, өйүн-санаатын далааһына, дойдутугар, дьиэ кэргэнигэр истиҥ сыһыана оҕоҕо олоххо бэлэмнээх, сатабыллаах, уопсастыбаҕа туһалаах дьоһун киһи буола улаатарга, иннигэр туруоруммут сыалларын-соруктарын ситиһэргэ холобур буолар.
Биһиги өрөспүүбүлүкэбитигэр урут уруккуттан элбэх оҕолонуу, иллээх-эйэлээх улахан дьиэ кэргэттэр ытыктаналлар, кинилэр үтүө үгэстэрэ тутуһуллар, сиэрдээхтик олоҕу олоруу кэрэхсэнэр. Үүнэр көлүөнэни дьиэ кэргэҥҥэ иитии сүдү суолталааҕын, ол кэскилбитин түстүүрүн бары өйдүүбүт. Онон бу дьоро күн махтал тылларын бары ийэлэргэ, аҕаларга, эбэлэргэ, эһэлэргэ уонна иитиэх оҕолорго дьиэ кэргэн сылааһын, истиҥ кыһамньытын туһаайар төрөппүттэргэ тиэрдэбин.
Барыгытыгар чэгиэн-чэбдик туругу, этэҥҥэ буолууну, уйгулаах, дьоллоох олоҕу баҕарабын!
«Саханефтегазсбыт» АУо генеральнай дириэктэрэ, Саха Өрөспүүбүлүкэтин бар дьонун дьокутаата В.Н. Лебедев.