Бүгүн Таатта улууһугар умнуллубат бэлиэ түгэн тосхойдо. Ол курдук улуустааҕы элбэх өҥөнү оҥорор муниципальнай киин дьиэтин үһүс этээһигэр СӨ Бырабыыталыстыбатын гражданскай туругу сурукка киллэрэр салалта Таатта улууһунааҕы салаата саҥа киэҥ, сырдык хоһун арыллыыта үөрүүлээх быһыыга-майгыга ыытылынна.
Бу күн бары ытыктыыр күндү дьоммут Борис Федорович Неустроев-Мандар Уус кэргэнинээн Федора Борисовналыын ыал буолан олорбуттара 50 сылын, кыһыл көмүс урууларын бэлиэтээтилэр. Кинилэри сэргэ эдэр ыал Айна уонна Ньургун Ильиннар тапталларын холбоон ыал буоллулар. Кинилэргэ СӨ Бырабыыталыстыбатыгар ГТАС (ЗАГС) управлениетын салайааччыта Дария Васильевна Слепцова, Таатта улууһун баһылыгын социальнай боппуруостарга солбуйааччыта Никифор Никифорович Жерготов, Таатта нэһилиэгин баһылыга Егор Иннокентьевич Павлов эҕэрдэ тыллары эттилэр.
Түмүккэ Мандар Уус эдэр ыалга анаан ис сүрэҕиттэн алгыс тылларын анаата, уһун дьоллоох, эйэлээх олоҕу баҕарда.
СӨ үтүөлээх оһуохай этээччитэ, чуор куоластаах тойуксут, кылыһахтаах куоластаах ырыаһыт Иван Иванов бүгүҥҥү күн маанылаах ыалларыгар анаан торҕо тойугу дуоратта, илгэлээх алгыһы көтөхтө.
Саҥа саала күлүмүрдэс күөнүгэр, сырдык ыраас, алгыстаах эркиннэригэр саҥа ыал үксээтин, тапталлаах Тааттабыт үүнэ-сайда турарыгар төһүү күүс буоллун!
Сарыал Кыыма.
Хаартыска Дайаана Еремеева.