Баайаҕаҕа алтынньы ыйга И.М.Хатылаев аатынан Баайаҕа орто оскуолатын 155, М.Н.Хатылаева аатынан Баайаҕа модельнай библиотекатын 110, саха сырдатааччы суруйааччыта А.И.Софронов – Алампа төрүттээбит “Чолбон” сурунаала 100 сыллаах үбүлүөйдэрин чэрчитинэн оскуола, олохтоох библиотека холбоһуктаах бырайыактарынан “Үйэлээҕи саҕар үтүө кыымнар” декада ыытылынна.
Оскуолабыт уһун сыллар устата үгүс көлүөнэ ыччаты кынат үүннэрэн көтүттэ, кинилэртэн республикаҕа эрэ буолбакка, Россияҕа, аан дойдуга үрдүк ситиһиилээх биир дойдулаахтарбытынан киэн туттабыт. Эдэркээн 22 сааһыгар Россия Государственнай Бириэмийэтин лауреатын үрдүк аатын ылбыт СР үтүөлээх артыыһа Иннокентий Луковцев, саха төрүт музыкатын аан дойдуга таһаарбыт Герман Хатылаев, мас рестлиҥҥэ Аан дойду чемпионнара Туйаара Орлова, Константин Жирков аныгы кэмҥэ төрөөбүт түөлбэлэрин аатын киэҥ эйгэҕэ дорҕоонноохтук ааттаталлар. Онтон литература эйгэтигэр Баайаҕа орто оскуолатын бүтэрбит Гаврил Андросов Баайаҕаттан аан бастакы суруйааччы, Россия суруйааччыларын сойууһун чилиэнэ, Намжил Нимбуев аатынан норуоттар икки ардыларынааҕы поэзия турнирын кыайыылааҕа, “Современник” сурунаал Юрий Кузнецов аатынан Бириэмийэтин лауреата, “Молодая поэзия России” Бириэмийэ лауреата, Казахстан Л.Н.Гумилев аатынан Евразийскай национальнай университетын “Лев Гумилев” мэтээллээх, 100 сылын бэлиэтиир “Чолбон” сурунаал бас редактора.
Гаврил Андросов — Таатталартан сэттис бас редактор. Күн бүгүн кырдьаҕас сурунаалга Гаврил Андросовы сэргэ Баайаҕаттан республика биир бастыҥ редактора Анна Прудецкая эппиэттиир сэкирэтээринэн айымньылаахтык үлэлиир.
Үөрэҕи-билиини, сырдыгы тарҕатар биир соруктаах үс кыһа ситимнээх үлэтин, Баайаҕа талааннаах айар дьонун туһунан тэрээһин оскуола бары үөрэнээччилэрин хабан ыытылынна. Алын, орто сүһүөх үөрэнээччилэргэ “Чолбон” — литература арахсыспат аргыһа” библиотечнай уруоктар, улуус нэһилиэктэрин библиотекаларын акциятыгар кыттыһан “Оҕоҕун кытта аах” балаһаны дьиэ кэргэҥҥэ ааҕыы тэрилиннэ.
Үрдүкү кылаас үөрэнээччилэригэр “Чолбон” сурунаалы кытта бииргэ үлэлиир библиотека “Көмүлүөк күлүмэ” литературнай түмсүүтүн ааптардара – бэтэрээн учууталлар: поэт, публицист, биллиилээх тылбаасчыт Владимир Семенович Андросов, “Чолбон” сурунаал В.Н.Протодьяконов аатынан сабыылаах литературнай критика конкурсун кыайыылааҕа, хоһоонньут, “Мандар Уус” кинигэ ааптара Галина Иннокентьевна Неустроева, кыраайы үөрэтээччи, үгүс кинигэ ааптара, литературнай критика конкурсун кыайыылааҕа Маргарита Романовна Егорова, Россия суруйааччыларын Сойууһун чилиэнэ, литературнай критика сабыылаах конкурсун икки төгүллээх кыайыылааҕа, бастакы редактор – Алампа аатынан Бириэмийэ икки төгүллээх кыайыылааҕа Ольга Николаевна Макарова; “Чолбон өй күрэһэ” республикатааҕы ааҕар дьиэ кэргэн күрэһэр 1 миэстэни ылбыт, библиотека бастыҥ ааҕааччыта Полина Николаевна Кустурова; бас редактор Гаврил Андросов маҥнайгы учуутала, чиҥ билии олугун охсубут Екатерина Николаевна Луковцева ыҥырыылаах ыалдьыт буолан оҕолорго тылларын-өстөрүн тиэртилэр. Киһи быһыытынан сайдалларыгар тирэх буолбут, “Чолбон” сурунаал геройдарын холобуругар иитиллибит, ааҕыыны олох аргыһа оҥостубут ытыктыыр учууталларбыт оҕо саастарыгар сурунаалга ааҕан билэр суруйааччыларын кытта аны үөрэх, үлэ аартыгар алтыһыыларын, “Чолбон” сурунаал олохторугар, айар үлэлэригэр суолтатын умсугутуулаахтык кэпсээтилэр, оҕолорго туһаайан дойдугут киэн туттар дьоно буолан тахсыҥ диэн алгыстарын тиэртилэр. Күн бүгүн кинилэр иитэн-үөрэтэн таһаарбыт үөрэнээччилэрэ Гаврил Андросовтыын бииргэ үлэлээн саха тылын, литературатын сайыннараллар, биһиги киэн уонна күөн туттар ытык дьоммут буолаллар.
Үөрэнээччилэр сурунаал олоҕу кытта тэҥҥэ хардыылаан элбэх бырайыактары, конкурстары тэрийэрин, онно кыттыахтарын, гаджет нөҥүө “Чолбон” сурунаалы билсиэхтэрин, ааҕыахтарын сөбүн биллилэр, түмүккэ Галина Иннокентьевна, Владимир Семенович хоһооннорун дорҕоонноохтук ааҕан иһитиннэрдилэр.
“Чолбон” сурунаал нөҥүө төрөөбүт нэһилиэкпит чулуу дьонун кытта алтыһыннарар тэрээһиммит оҕолор өйдөрүгэр-сүрэхтэригэр иҥэн инники олохторугар эркээйи буолуо диэн эрэнэбит.
Александра Кустурова, М.Н.Хатылаева аатынан модельнай библиотека
“Көмүлүөк күлүмэ” литературнай түмсүүтүн салайааччыта.