Таатта улууһугар ааспыт өрөбүллэргэ Саха Өрөспүүбүлүкэтигэр “Аҕа дойдуну көмүскээччилэр” фондаларын социальнай координатора Яна Винокурова көҕүлээһининэн анал байыаннай дьайыыга сылдьыбыт ветеран уолаттары бииргэ түмэр сыалтан көмүс күһүнү баттаһа айылҕалыын алтыһа Алдан өрүскэ тиийэн, көмүс хатырыктааҕы хаптаран сынньанан кэллилэр.
Бу тэрээһини өйөөн Яна Ивановнаны кытта күн бүгүн анал байыаннай дьайыыга Ростов на Дону госпитальга волонтердуу сылдьар, уоппускатыгар кэлбит юрист идэлээх Агафья Петровна Слепцова барса сырытта.
“Уопсайа тохсуо буолан, айаммыт ороскуотун бары кыттыһан, күммүт туран биэрэн, олус үчүгэйдик айылҕалыын алтыһан кэллибит. Уус Тааттаттан икки моторканан Алданынан устан, Хаандыга үрэҕэр диэри тиийэ сырыттыбыт. Байанайбыт күндүлээн, сордоҥ, алыһар хаптаран, уолаттар олуһун астыннылар”, — диэн Яна Ивановна сырдатта.
Маннык сырыы, айылҕалыын алтыһыы олус наадалааҕын өйдөөн сынньалаҥы тэрийбит Яна Ивановна Винокуроваҕа уолаттар барҕа махтал тылларын аныыллар.
Галина ПОЛУСКИНА.
Яна Винокурова хаартыска түһэриитэ.