Балаҕан ыйын 8 күнүгэр Харбалаахтааҕы үөрэхтээһин холбоһугун лицей салаатын үөрэнэр корпуһугар анал байыаннай дьайыыга төрөөбүт дойдутун туһугар бэриниилээхтик охсуһа сылдьан суорума суолламмыт «Баһаарынньык-22» бөлөх выпускнига Лукинов Симон сырдык кэриэһигэр киниэхэ аналлаах «Дьоруой паартата» арылынна.
Тэрээһини холбоһук дириэктэрэ Л.А. Афанасьева саҕалаата. Кини маннык хорсун үөрэнээччилэрдээхпитинэн киэн туттарын бэлиэтээн эттэ. Салгыы Орто Амма сэлиэнньэнэн тэриллиитин баһылыга А.И.Кулачиков, байыаннай дьайыы кыттыылааҕа С.И. Шараборин, бэтэрээн учуутал Г.Г. Сорова тыл эттилэр. Холобур буолар дьоһун уолбут аата куруук ааттана, бу паарта биһиги Симоммытын куруук саната туруо диэтилэр. Түргэнник эйэлээх олох туругуруон баҕардылар.
Тэрээһини В.С Кривошапкина салайар «Харбалаах уоланнара» бөлөҕө «Улуу Ильмень» хоһоонунан ситэрэн биэрдилэр.
Симон Лукинов биир дойдулаахтара Ньурба Дьиикимдэтиттэн быһа холбонон, уолларынан киэн тутталларын уонна киниэхэ аналлаах паарта арыллыбытыгар, үйэтитиигэ үлэ барарыгар махтанан тыл эттилэр.
Лицей студеннара, холбоһук үөрэнээччилэрэ бу ытык миэстэни куруук көрө-истэ, сүгүрүйэ сылдьыахтара диэн эрэнэбит.
Симон Лукинов хорсун холобура Аҕа дойдуга бэриниилээх буолуу үтүө холобура буолан, үрдүк санааҕа угуйа, ыҥыра туруо!
Снежана Халыева, Валентина Кривошапкина, Харбалаахтааҕы үөрэхтээһин холбоһуга