Э.К.Пекарскай аатынан Игидэй орто оскуолата РФ министерствотын өйөөһүнүнэн “Знание” төрөппүттэр сообществоларын уопсастыбата көҕүлээһининэн тэрийбит гранын кыайыылааҕынан тахсан, 900-н тахса тыһыынчанан үбүлэннэ.
Граны көмүскүүргэ күүстээх хамаанда үлэлээтэ. Ол курдук, оскуола дириэктэрэ А.А.Миронов, соц.педагог А.В.Бойтунова, психолог А.К.Захарова, иитэр үлэ саабыһа Л.Н.Захарова, төрөппүт кэмитиэтин бэрэсэдээтэллэрэ М.С.Лебедева, М.Г.Егорова күрэскэ барыта 7000-н тахса сайаапка киирбититтэн 4395 бырайыактан 397 сайаапка өйөбүлү ылла. Игидэй орто оскуолата «Уйулҕа» кабинетын тэрийии бырайыагынан кыттан кыайыылаах үрдүк аатын сүктэ.
Алтынньы 26 күнүгэр тупсаҕай оҥоһуулаах, саҥа аныгылыы оборудованиенан “Уйулҕа” хоһун арыйыы үөрүүлээх түгэнэ тосхойдо. Игидэй орто оскуолатын үөрэнээччилэрэ, коллектива, ыҥырыылаах ыалдьыттар өрө көтөҕүллэн туран, бука бары биир тыынынан тэрээһин тэтимигэр киирдилэр. Күндү ыалдьыттарынан буоллулар: улуустааҕы үөрэх салаатын начальнига И.И.Дягилев, солбуйааччыта Т.А.Тютрина. Тыа сирин көҕүлүүр дирекция дириэктэрэ Г.Г.Вырдылин, сүрүннүүр исписэлииһэ В.И.Колодезникова санааларын үллэһиннилэр, бэйэлэрин эҕэрдэлэрин тиэртилэр.
Тэрээһин үөрүүлээх чааһын иилээн-саҕалаан ыыттылар Н.Б.Баннова-дириэктэр сүбэһитэ, М.П. Ермолаева, нуучча тылын уонна литературатын учуутала.
Бу курдук өрөгөйдөөх күн Игидэй орто оскуолатыгар тосхойдо. Саҥа арыллыбыт «Уйулҕа» хоһо уһун үйэлээх буоллун, элбэх оҕоҕо, төрөппүккэ сырдыгы сыдьаайар, санааны бөҕөргөтөр таһаарыылаах үлэни ыыттын.
Варвара Ефимова