Ытык Иэс… Ытык Анал…
Бу тыллар дириҥ ис хоһоонноро киһи-аймах баарын тухары кини историятыгар сүрүн миэстэни ылбыттара, ылаллар уонна ылыахтара даҕаны…
Кулун тутар 6 күнэ. 2026 сыл. Бүгүн ОДьКХ Баайаҕатааҕы учаастагар ураты күн буолла. АБДь-га бэйэтин эдэр олоҕун, сырдык ыра санаатын толук уурбут биир дойдулаахпытыгар, сантехник, сварщик идэлээх уолбутугар Василий Гаврильевич Андросов сырдык аатыгар сүгүрүйэн, үлэлээбит тэрилтэтигэр Өйдөбүнньүк бэлиэ турда.
Манна мустубут дьон өйүгэр-санаатыгар Василий килбик мичээрэ, туохтан да толлубат хоодуот санаата, олоҕо, үлэтэ киинэ лиэнтэтин курдук элэҥнээн аастаҕа…
… Кыракый уолчаан: “Ийээ, күүт!”-диэн ийэтин эккирэтэн, ийэ-хара көлөһүнэ сирэйинэн сүүрэр, кини онно кыһаммат, кини ийэтин ырбаахытын от-мас быыһыгар сүтэрбэт мөккүөрдээх. Ол сүүрэн иһэн, иннигэр кып-кыһыл, уп-улахан дьэдьэн сэбирдэх быыһыттан тахсан кэллэ. Уолчаан муодарҕаан, одуулаан турда. Сыта дыргыйан, күн диэки нуоҕайан, тэһэ көрөн турда. Уолчаан үргээн ылан, айаҕар тиэрдэн иһэн: “Ийээ, ханна бааргыный? Мин дьэдьэн буллум!” — диэн уҥа-хаҥас көрө турда…
Кыракый Васяттан Ийэ дойдутун көмүскүүр эр санаалаах Василий Андросов икки арда баара суоҕа биир хардыы этэ ээ.
Өйдөбүнньүк бэлиэни Василий аҕата, үлэ бэтэрээнэ Гаврил Васильевич Андросов, эдьиийэ Дария Гаврильевна Верховцева астылар.
Бүгүн Василий Андросов төрөөбүт күнүгэр хара мрамортан кутуллан, тапталлаах, ахтылҕаннаах Баайаҕатыгар үйэ-саас тухары хаалыаҕа.
Тэрээһиҥҥэ ОДьКХ Тааттатааҕы филиалын дириэктэрэ В.П.Будикин, “Баайаҕа нэһилиэгэ” дьаһалта баһылыга А.Р.Романов, учаастак маастара О.С.Андросов, Василий убайа Г.Г.Андросов бэйэлэрин тылларын-өстөрүн тиэртилэр.
ОДьКХ хачыгаар уолаттара аны сэбиэскэй кэмнээҕи “За того парня” диэн ыҥырыынан салайтаран, Василийдарын туһугар эмиэ үлэ үрдүк нуорматын толоруохтара диэн эрэнэбит.
Туох да умнуллубат, ким да умнуллубат!
Маргарита Егорова, хаһыат общ. корр.