Оскуоланы бүтэрэр сылбыт чугаһаан, ыга анньан истэҕин аайы, бары да тус олохпут туһугар долгуйан ыларбыт буолуо. Арыт ардыгар оҕо саас хаһан да бүтүө суоҕун курдук саныыгын, эрээри оҕо саас амсайыы курдук олус түргэнник ааһар. Онон бэйэҥ олоххор эппиэтинэстээх быһаарыныыны ылынар кэмиҥ сим биир тигинээн тиийэн кэлэр. Онтон бэйэҥ ыллык суолгун таба тайаннаххына, идэҕин баһыйан, киһи буолан килбэйэн, бу орто туруу бараан дойдуга дьол амтанын билэн, үүнэн-сайдан тахсаҕын. Барыта да кыраттан тутуллан, оҥоһуллан тахсар буоллаҕа. Мин бүгүҥҥү дьоруойум кыра эрдэҕиттэн дьонун үтүө холобур оҥостон, үтүө үгэһи утумнаан, аҕатын туйаҕын хатаран, үлэттэн толлубат, билиигэ тардыһыылаах, киэҥ көрүүлээх эдэр кэскиллээх үлэһит Саргылаан Эляков буолар. Кини чахчы эдэр ыччакка сиэркилэ кэриэтэ, үтүө холобур буолар. Саргылаан кыра сааһыттан үлэҕэ тардыһан, бэйэтин олоҕун былааннаан, сыал туруорунан оскуолатын 9-с кылааһынан бүтэрэн, Дьокускайдааҕы промышленнай техникумун орто анал үөрэҕэр киирэр. Манна икки сыл, уон ый үөрэнэн, ситиһиилээхтик бүтэрэн, төрөөбүт дойдутугар Тааттатааҕы РЭС тэрилтэтигэр электромонтерунан киирэр. Бу курдук идэтин сөбүлээн, икки сыл кэннэ үрдүк үөрэх кыһатыгар ХИФУ-га, физико-техническай үнүстүүтүгэр үрдэтинэ сылдьар. Иллэҥ кэмигэр айылҕалыын алтыһан, саҥаны үөрэтэн, доҕотторун көрсөн, успуордунан дьарыктанан, этин сиинин чэбдигирдэр чөл олоҕу тутуһар. Бэйэтэ олус
сэмэй, элэккэй буолан дьоҥҥо сыһыана сымнаҕас, ол оннугар бэйэтигэр күүстээх ирдэбиллээх. Саргылаан элбэх оҕолоох Михаил Семенович уонна Мария Семеновна Эляковтар дьиэ кэргэттэригэр иккис оҕонон үүнүү-сайдыы билии ыйыгар, алгыс тыл этиллэр күнүгэр, ол эбэтэр балаҕан ыйын 21 күнүгэр күн сирин көрбүт. Кини ыал улахан оҕото буолан кыра эрдэҕиттэн үлэҕэ эриллэн улааппыт. Аҕата Михаил уолун, олох эрдэттэн батыһыннара сылдьан дьиэ ис-тас үлэтигэр бэйэтин холобурунан иитэн, толоругас буоларга, дьыаланы тиһэҕэр тиэрдэргэ, эр киһи дьиэ кэргэҥҥэ оруола ураты суолталааҕын биллэрэн, айылҕаҕа сыһыаран аҕа тапталынан бигэ тирэх буоллаҕа, онтон ийэ киһи дьиэ ис эйгэтигэр истиҥ сыһыаны олохтоон, иэримэ дьиэлэрин араҥаччылаан, ийэ сылаас тапталын иҥэрэн дьол уйатын туттаҕа. Михаил Семенович Тааттатааҕы РЭС тэрилтэтигэр үлэлээбитэ номнуо 10 тахса сыл буолбут. Уолун үрдүкү кылаастан саҕалаан, бэйэтин үлэтигэр тэбис тэҥҥэ батыһыннара сылдьан үлэлиир эбит, ол иһин да буолуо Саргылаан бу идэни олох эрдэттэн сөбүлээн, сыал-сорук туруорунан үөрэххэ дьулустаҕа. Билигин кырачаан быраата аҕалаах убайын курдук бу идэни сэҥээрэр эбит. Бу буоллаҕа дии, аҕа киһи уолаттарыгар үтүө холобур буолара. «Саха ыччатыгар баҕарыам этэ, бастатан туран, кытаанах доруобуйаны, чөл туруктаах буолуҥ, сыаллаах буолуҥ. Тохсус кылаас кэннэ барыан баҕалаахтар хайаатар да күүстээх сыал-сорук оҥостон, санааны сааһыланан, эрэллээх уонна баҕалаах буоллаххытына ситиһиэххит турдаҕа. Киһи бэйэтин иннигэр эппиэтинэс ылынан, билиигэ тардыһан, куруук төбөнү үлэлэтэн, айатута сылдьыахтаах, очччоҕо ситиһии аргыстаах буолуоххут. Үлэ киһини киэргэтэр, сайыннарар. Барыта бэйэбититтэн эрэ тутулуктааҕын умнумаҥ».- диэн аҕа киһи сүбэтин тиэрдэр. Кырдьык даҕаны, билиҥҥи үйэҕэ олоххо тардыһыылаах, үлэһит киһи элбэҕи ситиһэр, дабайар кэмэ кэллэ. Онон Саргылааҥҥа баҕарыа этибит ситиһии аргыстаах, байылыат олоҕу. Бу курдук бигэ тирэхтээх буолан, үүнэн-сайдан, саҥаны-сонуну тобула, сайдыы суолугар иннин хоту баран иһэргэр.
