Тааттаҕа үөрэх үлэһиттэрин комплекснай спартакиадаларын түмүктүүр түһүмэҕэ ыытылынна

Арассыыйаҕа Дьиэ кэргэн, Саха Өрөспүүбүлүкэтигэр Оҕо сылыгар анаммыт Таатта улууһун үөрэх үлэһиттэрин комплекснай спартакиадатын үһүс түмүктүүр түһүмэҕэ ыытылынна.

Бу күн улуус 20 үөрэх тэрилтэттиттэн сүүмэрдэммит 11 хамаанда, 92 үөрэх эйгэтин үлэһитэ кыттыыны ылла. Спортсменнар дуобакка, остуол тенниһигэр, саха остуол оонньуутугар – хабылыкка, хаамыскаҕа илин-кэлин түһүстүлэр. Санатар буоллахха, саас хамаандалар волейболга, саахымакка, теннискэ, дартска күрэхтэһэн тураллар. Спартакиада аһыллыытыгар спортсменнары үөрэх салалтатыттан Т.А. Тютрина, профсоюз председателэ П.В. Борисов, судьуйалар Н.Н. Никифоров, А.В. Аргунова, Л.Р. Захарова, ылбаҕай ырыанан Ытык Күөл 1 нүөмэрдээх оскуолатын технология учуутала Николай Степанов эҕэрдэлээтилэр.
Ытыыга эр дьоҥҥо 1 миэстэни Огоннеров Гаврил Тыараһа оскуолата, 2 миэстэни Павлов Илья Таатта лицейэ, 3 миэстэ Саввин Павел Чымнаайы оскуолата, үһүөн физкультура учууталлара ыллылар. Кэрэ аҥардарга Аргунова Октислава эбии үөрэх хамаандатыттан (үөрэх салалтата, ДАЮСШ, «Сатабыл»), Тарбахова Любовь, Федорова Любовь, иккиэн Дьохсоҕон оскуолатыттан, туһааннааҕынан бириистээх миэстэлэри үллэһиннилэр. Хамаанданан түмүккэ Эбии үөрэх хамаандата бастакы, Тыараһа иккис, Чымнаайы үһүс буоллулар.
Дуобакка бастакы дуоскаҕа Дягилев Ньургун эбии үөрэх хамаандатыттан соргулаахтык оонньоон бастакы миэстэни ылла, иккис миэстэҕэ Таатта лицейиттэн Щукин Иван Иванович ылла, үһүскэ Уолбаттан Харайданов Александр таҕыстылар. Иккис дуоскаҕа Борисов Прокопий эбии үөрэх хамаандатыттан, Посельскай Альберт Таатта лицейиттэн, Жараев Сергей Дьохсоҕонтон бириистээх миэстэлэри үллэһиннилэр.
Кэрэ аҥардарга, күүтүллүбүтүн курдук, Ытык-Күөл бастакы нүөмэрдээх оскуолатын күүстээх оонньооччута Захарова Любовь тэҥнээҕин булбата. Кини кэнниттэн Игидэйтэн Колесова Мария, Гладкина Аграфена Дьохсоҕон оҕо саадын иитээччитэ бириистээх миэстэлэргэ таҕыстылар.
Хабылыкка, хаамыскаҕа эр дьоҥҥо Уолба оскуолатыттан Попов Василий, кыргыттарга Тыараһаттан Турнина Людмила бастакы миэстэни ыллылар. Эр дьоҥҥо спорт ветерана «Чуораанчык» оҕо саадын эбии үөрэхтээһин педагога Никифоров Николай Николаевич иккиһи, Кусатов Владимир Уолбаттан үсүһү, кыргыттарга «Сулусчаан» оҕо саадын иитээччитэ Андреева Наталья иккиһи, Таатта лицейиттэн Аввакумова Ульяна үсүһү ылан үөрдүлэр-көттүлэр.

 
Сэттэ көрүҥ түмүгүнэн, үһүс бириистээх миэстэҕэ Тыараһа хамаандата таҕыста. Бу хамаанда хаһыс да сылын бириистээх миэстэттэн түспэт. 2022 сыл чөмпүйөннэрэ. Былырыын 4-с миэстэ буолбут, Таатта лицейин хамаандата иккис миэстэҕэ таҕыста. Эбии үөрэх хамаандата бары көрүҥнэргэ эриэ-дэхси киирсэн, бастакы миэстэни ылла. Иккис сылын субуруччу көһө сылдьар кубогы илдьэ барар чиэскэ тигистэ. Салгыы миэстэлэри Чымнаайы, Ытык-Күөл 2 нүөмэрдээх, Дьохсоҕон, Уолба оскуолалара үллэһиннилэр. Лидердэргэ чугас сылдьалларын биллэрдилэр.

Үөрэх үлэ

Читайте дальше