Бүгүн олус үөрүүлээх сонуну үллэстиэхпин баҕарабын. Ол курдук Дьохсоҕон олохтооҕо, Өксөкүлээх Өлөксөй аатынан оскуолаҕа саха тылын, литературатын учууталынан үлэлээбит, билигин Өксөкүлээх түмэлин үлэһитэ Галина Константиновна Давыдова Бүтүн Россиятааҕы XI ”Самая красивая страна” диэн фотоконкурска “Россия в лицах” диэн номинацияҕа 2-с миэстэни ылла!
Тута Галина Константиновнаҕа эрийэн эҕэрдэлээн баран конкурска кыттыы туһунан ыйыттым.
Хаартысканан дьарыктаммытым уонтан тахса сыл буолла. “Таатта-ытык дойду” диэн түмсүүлээхпит. Манна хаартыскаҕа түһэрэр дьон бииргэ дьарыктанабыт, уопут үллэстэбит, сүбэлэһэбит, бэйэ-бэйэбитигэр көмөлөһөбүт, быыһыгар балыктыыбыт, айанныыбыт. Кинилэр куруук өйөбүл буолаллар. Маҥнай утаа саҕалыырбар оскуолаҕа учууталлыы сылдьан “учуутал барытын сатыахтаах” диэн санаанан салайтаран хаартыскаҕа түһэрэргэ, оҥорорго үөрэммитим. Онтон Александр Петров диэн Мирнэй уола республика үрдүнэн группа тэрийбитигэр, онно киирбитим. Туох эрэ үчүгэйи уратыны көрөн тута түһэрдэхпинэ астынабын, дуоһуйабын. Бу дьарыкпын хоббим диибин, бэйэбин профессионалбын диэн санаммаппын. Хаартыскаҕа түһэрэр буолан, сонун кадры эккирэтэн элбэхтэ кэллим-бардым, хотунан-соҕуруунан айаннаатым.
Урут Россия таһымнаах конкурстарга кытта илигим. Бу конкурска үҥкүүһүт Дмитрий Артемьев “кытын” диэн мас-таас курдук этэн кэбиспитэ. Ону мин “сөп” диэбитим. Ханнык хаартысканы ыытабыный диэн толкуйдуу сырыттахпына ойууһут Сууралдьыма: “Түннүгүнэн көрөн турар оҕону ыыт, быыстапкаҕа, конкурска сөптөөх үлэ,”- диэн эппитэ. Бастаан Россияҕа уон иһигэр киирбитим, онтон 2-ис миэстэ буолан соһуйдум да, үөрдүм да. Үлэм түмүгэ дии саныыбын.
Бу хаартыска устуоруйата маннык. Биирдэ түмэл үлэһиттэрэ:”Буклет таһаарабыт, онно баһаалыста кэлэн түһэриэҥ дуо?”- диэн көрдөспүттэрин быһа гыммакка Хадаайыга тиийдим. Онно Дьохсоҕон кыыһа Наташа Григорьева уолунаан Эрсанныын бааллара. Элбэх киһини түһэрбитим, онтон Эрсан таһырдьа оонньуу сылдьан балаҕан түннүгүнэн өҥөс гыммытын хабан ылбытым. Киһи анаан түһэрбитэ табыллыбат ээ. Соһуччу, эмискэ түһэрдэххэ ордук истиҥ буолар дии саныыбын. Онон геройум Ытык Күөлгэ олорор, үөрэнэр Эрсан Таппыров буолар.
Галина Константиновна күннээҕи олоххо кэрэни тутан, сонун уобарастары кыл түгэҥҥэ хабан ылан камера объективыгар хатыыр, үйэлээх кадр оҥорор ураты талааннаах дии саныыбын. Айар үлэтигэр үрдүк дабайыылары баҕарабын!
Галина Давыдова хаартыскаларыгар Эрсан Таппыров
Сарыал Кыыма