Кулун тутар 21-22 күннэригэр Ханты-Мансийскайга ыытыллыбыт Бүтүн Россиятааҕы региональнай «Малая Родина – сила России» иккис форумугар Саха сирин делегациятыгар киирэн Октябрьскай нэһилиэк баһылыга А.П.Семенов кыттыыны ылла.
Дойду баһылыгын дьаһалынан историческай өйдөбүллэри, культурнай объектары харыстыыр, үйэтитэргэ аналлаах «Наследие» форумҥа 86 регионнартан делегациялар, Госдума депутаттара, сенатордар, экспертэр, общественнай түмсүүлэр кытыннылар. Форумҥа элбэх, киэҥ далааһыннаах кэпсэтиилэр, этиилэр, ырытыылар буоллулар. Ол курдук культурнай объектарга, историческай бэлиэ сирдэргэ, холобур буолар хорсун дьоҥҥо, норуот үгэстэригэр, нематериальнай культураҕа, норуоттар икки ардыларыгар сыһыаҥҥа, туризм сайдыытыгар болҕомто уурулунна, ол тула опыт, санаа атастаһыыта буолла. Форумҥа Саха сирин аатыттан Андрей Петрович “Родовые гнезда – преемственность поколений” секцияҕа кыраайы үөрэтээччи, общественник Г.Г.Вырдылин үлэтинэн “Уточнение расположений родовых гнезд Октябрьского наслега Таттинского улуса РС (Я), и внесение этих данных в Телеграмм-канале для доступа подрастающего поколения” диэн дакылаатынан кыттан улахан сэҥээриини ылла. Онон, Гаврил Гаврильевич өбүгэ сирин электроннай картаҕа киллэрэн үйэтиппит үлэтэ киэҥ Россияҕа тарҕанна. Форум үлэтин түмүгүнэн сөптөөх дьаһаллар, саҥа сокуоннар тахсаллара күүтүллэр.
Р.Таппырова.