Ыам ыйын 24 күнүгэр Амма улууһугар, Д.Н. Трифонов аатынан Муона ипподромугар Амма, Таатта, Чурапчы улуустарын сүүрүк аттарын икки ардыларыгар “Боотур Уус кубога” диэн бэрт үтүө тэрээһини ыыттыбыт.
Бу кубокпыт сылын ахсын ыытыллар күрэхтэһии буолуоҕа уонна улуустан улууска көһө сылдьыаҕа. Эһиилги кубок ыам ыйыгар Чурапчыга, онтон 2027 сылга, улуу Өксөкүлээх Өлөксөй төрөөбүтэ 150 сылыгар ананан ытык Таатта сиригэр ыытыллыаҕа. Эһиилгиттэн Уус Алдан уонна Мэҥэ Хаҥалас улуустара кыттыстахтарына “Илин Эҥэр зонатын сүүрүк аттарын кубога” диэн ааттанан салҕаныаҕа. Сыыспат буоллахпына, Илин Эҥэр зонатын кубога бүтэһигин ааспыт үйэҕэ ыытыллыбыта. Онон биэс улуус бэһиэн сүүрүк аттарданан, мантан антах саха омуга биир ураты күрэхтэһиитин, көрүн-нарын өрө тутуохпут, олохтуохпут.
Бүгүн ыытыллыбыт күрэхтэһии — “Боотур Уус кубогар” зачеттаах сүүрүүлэр.
Бастакы сүүрүүгэ1600 миэтэрэҕэ 3 саастаах Саха сиригэр төрөөбүт аттар сүүрдүлэр. Манна 3 ат сүүрдэ. Кыайыылааҕынан Чурапчыттан Арчылаан 1,57,60 мүн көрдөрөн таҕыста. Сүүрдээччи Анатолий Куличкин. Иккис миэстэ Амматтан Адмирал 1,58,20 мүн. кэлэн буолла. Сүүрдээччи Виктор Кандинскай. Үһүс миэстэ Тааттаттан Кыламана 2,03,82 мүн кэллэ. Сүүрдээччи Дмитрий Неустроев.
Ат сүүрдээччи Дмитрий Иванович Неустроев
Иккис сүүрүүгэ, Республика биир сүрүн бирииһин хаһаайына, приз «Национальное достояние» кыайыылааҕа Блек Грэк иккис кэллэ. Бу сүүрүүгэ Амма аатыттан сүүрэн бастаабыт Нейтрон “Манчаары оонньууларыгар” Таатта аатыттан 1600 миэтэрэ дистанцияҕа сүүрүөҕэ.
Үһүс сүүрүүгэ, Амматтан Мистер Персон диэн ааспыт күһүн соҕурууттан атыылаһыллан кэлбит саҥа сүүрүк, Чурапчыттан ааспыт сыллааҕы Лээги Кубогын хаһаайынынан буолбут Гольфстрим Ван уонна Тааттаттан 2023 сыл түмүгүнэн Республикаҕа «Лучший Майлер года» анал номинация хаһаайына Спартанец Ром сүүрдүлэр. Бу сүүрүүгэр биһиги аппыт толору бэлэмнээҕин көрдөрөн эрэллээхтик бастаата.
Түмүккэ үс хамаанда үһүөн очколарбыт тэҥнэспиттэринэн, алталыы очко, биир сүбэнэн, туора киһиэхэ жребий тартаран үс сүүрүүттэн биирин түмүгүнэн уопсай түмүгү таһаарыаҕын диэн буолбута. Ол түмүгэр Нейтрон кыайыытынан Амма улууһа бастаан таҕыста.
Зачету таһынан сүүрүүлэргэ, ааспыт күһүн соҕурууттан атыылаһан аҕалбыт сүүрүкпүт Титан Мо Сахабыт сирин ипподромугар бастакы сүрэхтэниитин ааста, бэрт үтүө түмүгү көрдөрдө. Утарылаһааччыбыт, ааспыт күһүн Забайкальскай крайтан атыылаһыллан кэлбит, ааттаах-суоллаах Табрис. Чиптээх саха боруода аттарыгар Дьүлэйтэн кыттыбыт Дедуль 3200 миэтирэ сүүрүүгэ төрдүс миэстэ буолла. Дедуль ааспыт сыллаахха 10 000 миэтэрэ сүүрүүгэ Бырабыытылыстыба Бэрэссэдээтэлин анал бирииһигэр Дохсун диэн сүүрүкпүт кэннэ иккис буолбута. Дохсуммутун бу сүүрүүгэ харыстааммыт сүүрдүбэтибит, сайын “Манчаары оонньууларыгар” чиптээх аттар сүүрүүлэригэр 7000 миэтэрэҕэ сүүрүөхтээх.
Хамаандабыт баар-суох тренерыгар, фанат уолбутугар Семен Васильевич Васильевка барҕа махтал, быйылгы сыллаах сүүрдүү сезонун үтүө түмүктэрдээх саҕалаабыккынан үгүрү-сүгүрү буолуохтун. Сүүрдээччибитигэр, бүгүҥҥү күрэхтэһиигэ, биэс аты сүүрдүбүтүттэн үстэ бастакы, биирдэ иккис уонна биирдэ үһүс миэстэлэри ылары ситиспит Дмитрий Иванович Неустроевка — Мичикэҕэ ураты махтал. Дохсуммутун уонна Дедульбутун дьарыктыыр, ат сүүрдүүтүнэн ис сүрэҕиттэн ылынан туран бэриниилээхтик үлэлиир, ааспыт күһүн ипподром баҕанатын хатырыктааһыҥҥа саамай элбэхтик үлэлэспит Дмитрий Иванович Гуляевка махтал мааныта. Уонна, удьуор сылгыһыт, сүүрүк аттары баайыынан үгүс сыллар устата дьарыктаммыт, дьарыктана сылдьар убайбытыгар, бүгүҥҥү сүүрүүгэ анал сиэри-туому оҥорбут Лев Алексеевич Никифоровка ураты махтал буолуохтун.
Дьэ, доҕоттоор! Аттарбыт быйылгы сезоҥҥа стартарын ыллылар, аны кэлэр ый саҥата Дьокуускай куоракка Үс Хатыҥҥа Иннокентий Саввич Свинобоев аатынан ипподромҥа көһөн киириэхтэрэ. Бэс ыйын 13 күнүгэр Туймаада ыһыаҕар ыытыллыахтаах Ил Дархан бирииһин иһин күрэхтэһиигэ сүүмэрдиир сүүрүүлэргэ кыттыыны ылыахтара, онтон Туймаада ыһыаҕын кэннэ от ыйын маҥнайгы күнүгэр Ытык Күөлгэ көһөн кэлиэхтэрэ, Манчаары сүүрүүлэригэр бэлэмнэниини саҕалыахтара. Хамаандабытыгар ситиһиилэри баҕарыаҕын!
Петр Захаров, Таатта улууһун ат спордун федерациятын толорооччу дириэктэрэ