Бүгүн, олунньу 20 күнүгэр, А.Е. Турнин аатынан спорт дыбарыаһыгар Аҕа дойду көмүскээччилэрин күнүн көрсө, Чечня, Афганистан сэриилэрин уонна анал байыаннай дьайыы кыттыылаахтарыгар, кинилэр дьиэ кэргэттэригэр анаммыт «Защитником быть – Родине служить» диэн кэрэхсэбиллээх тэрээһин ыытылынна.
Мустубут ыалдьыттары Таатта улууһун баһылыгын социальнай боппуруостарга солбуйааччы Никифор Никифорович Жерготов, Таатта нэһилиэгин баһылыга Егор Иннокентьевич Павлов, Аҕа дойдуну көмүскээччилэр дьиэ кэргэттэрин кэмитиэтин салайааччыта, Арассыыйа Геройун ийэтэ Варвара Николаевна Максимова, «Аҕа дойдуну көмүскээччилэр» судаарыстыбаннай пуонда Таатта улууһугар филиалын социальнай координатора Яна Ивановна Винокурова, Таатта-Чурапчы улуустарын байыаннай комиссара Анатолий Маркинович Егоров эҕэрдэ тылларын тиэртилэр. Дмитрий Алексеевич Алексеевка, Владимир Петрович Колотинскайга «Ветеран боевых действий в Афганистане» түөскэ кэтиллэр мэтээллэри туттардылар. Бу курдук дьоруойдар хорсун быһыыларын, дойдуга бэриниилээх буолуу үрдүк суолтатын чопчулаан бэлиэтээтилэр.
Дьоһуннаах тэрээһин үөрүүлээх аһыллыыта Виталий Эверстов дууһаны таарыйар ырыатынан түмүктэннэ. Салҕыы ыалдьыттар спорт дыбарыаһын иһинэн сэргэх эскурсияҕа сырыттылар.
Сынньанан, эбиэттээн баран, күрэхтэһиилэр күүрээннээхтик саҕаланнылар. Анал байыаннай эпэрээссийэҕэ сылдьар буойуннар аҕаларын икки ардыгар дартска күрэхтэһии буолла. Анал байыаннай эпэрээссийэ кыттыылаахтара, сэрии бэтэрээннэрэ уонна оскуола оҕолоро буулдьанан ытыыга бэйэлэрин көрдөрдүлэр. Оҕолорго анаан «Көрдөөх старт» эстафета ыытылынна.
Киин бибилэтиэкэ үлэһиттэрэ биир дойдулаахтарбытыгар, анал байыаннай дьайыыга сылдьар буойуннарга анаан кэрэ аҥардарга уонна оҕолорго «Туллук» — эйэ уонна үтүө санаа бэлиэтин — истиҥ-иһирэх открыткалары оҥортордулар. Араас оонньуулары тэрийэн оҕо-аймах үөрүүтүн үксэттилэр.
Ону таһынан, ох саанан ытыыга бэйэни холонон көрөргө маастар-кылааһы Саха Өрөспүүбүлүкэтин биллиилээх охчута, спорт маастара, тренер Галина Лукинична Павлова ыытта. Кыттааччылары былыргы саха дьарыгар уһуйан, сэҥээриини ылла.
Маны тэҥэ баҕалаах ыалдьыттар Тааттатааҕы киин балыыһа идэлээх быраастара ыыппыт «Экспресс-диагностика» өҥөтүнэн туһанан, доруобуйаларын туругун бэрэбиэркэлэттилэр.
Бу тэрээһин Аҕа дойду көмүскээччилэрин үтүө ааттарын кэриэстээн, ыччакка дойдуга тапталы иҥэрэн, хорсун быһыыга уонна бэриниилээх буолууга үтүө холобур буолан, үйэлээх өйдөбүлү хаалларда.