Таатта улууһун, Дьохсоҕон нэһилиэгин бочуоттаах гражданиннара, СӨ норуот хаһаайыстыбатын үтүөлээх үлэһитэ, СӨ социальнай сулууспа туйгуна, Таатта улууһун «Общественнай үлэҕэ активнай кыттыытын иһин», «Үйэтитиигэ киллэрбит кылаатын иһин» бэлиэлэр хаһаайына, үлэ бэтэрээнэ Михаил Лукич, СӨ үөрэҕириитин туйгуна, СӨ учууталлар учууталлара, Уолба уонна Дьохсоҕон нэһилиэктэрин бочуоттаах олохтооҕо, педагогическай үлэ бэтэрээнэ Светлана Климентьевна Архиповтар Алампаны үйэтитиигэ уруккуттан үлэлэһэллэр.
Ол курдук, кинилэр туруорсууларынан 1986 сыл А.И.Софронов-Алампа төрөөбүтэ 100 сылын Таатта оройуонугар бэлиэтииргэ тыл көтөҕөн хамсааһыны таһаарбыттара, кини аатын үйэтитэргэ бастакынан 11 туруорсуулары оҥорбуттара.
Михаил Лукич Дьохсоҕон баһылыгынан үлэлии олорон Алампа төрөөбүтэ 110 сылын аан бастаан СӨ үрдүнэн бэлиэтииргэ СӨ Президенэ М.Е. Николаевка сурук суруйан, 1996 сылга Ыйааҕы таһааттарбыта. Дьохсоҕон култууратын дьиэтигэр Алампа аата иҥэриллибитэ, кыстык алааһыгар Оккуодайга обелиск туруоруллубута, элбэх суруйааччы, Бырабыыталыстыба уонна култуура министиэристибэтин үлэһиттэрэ, артыыстар кэлэн ыалдьыттаабыттара.
Салгыы М.Л.Архипов үс Алампа аатынан араас бириэмийэлэри олохтообута. Ол курдук, 2001 сылтан Алампа аатын сүгэр Ытык Күөл орто оскуолатын бастыҥ үөрэнээччилэригэр, 2006 сылтан Алампаны үйэтитэр дьоҥҥо, 2011 сылтан Дьохсоҕон орто оскуолатын үөрэнээччилэригэр уонна учууталларыгар стипендияны олохтообута.
Бу ыыппыт үлэлэрин сыаналаан, Михаил Лукич СӨ Алампа аатынан общественнай бириэмийэ олохтонуутугар ыҥырыллан, бастакы бириэмийэни туттарар, Дьокуускайга А.И.Софронов уулуссатыгар Алампа мрамор дуоскатын арыйар чиэскэ тиксибитэ.
Онон бу сэтинньи 14 күнүгэр Алампа төрөөбүт күнүн сылын аайы бэлиэтиирбитигэр кэргэннии Архиповтар улахан өҥөлөөхтөр.
Татьяна ПОПОВА.