Сергей Зверев-Кыыл Уола аатынан Үҥкүү тыйаатыра муус устар 2 күнүгэр Былатыан Ойуунускай аатынан Тааттатааҕы норуодунай тыйаатырга Саха Өрөспүүбүлүкэтин норуодунай, Арассыыйа үтүөлээх артыыһа Афанасий Афанасьев төрөөбүтэ 60 сааһыгар, айар үлэтэ 45 сылыгар анаан “Куйаар Уола. Кэрэни кытта сэргэстэһэн” дьикти эйгэлээх испэктээккэ ыҥырар.
Испэктээккэ үҥкүүһүт дьылҕата, айар үлэтэ, ыра санаата, үҥкүүгэ тардыһыыта, кини үөрүүтэ-көтүүтэ, курус хомолтолоох күннэрэ, кистэлэҥ баҕа санаалара, таптала, тоҥуй уонна истиҥ сыһыаннара, ыар толкуйдара, дьоннор быһыылара–майгылара, ыарахан-чэпчэки күннэрэ, өрөгөй уонна чуумпу кэмнэрэ көстөр. Либретто ааптара Ангелла Попова, режиссер Антон Ботаков, хореограф Мария Сайдыкулова, худуоһунньук Екатерина Шапошникова.
